محسن نقوی کے یوم پاکستان پر پیغام اور قوم کو مبارکباد
لاہور: نگران وزیرِاعلیٰ پنجاب محسن نقوی نے 23 مارچ کے موقع پر اپنے خصوصی پیغام میں کہا کہ یومِ پاکستان ہمیں ہمارے آباؤ اجداد کی قربانیوں اور جدوجہد کی یاد دلاتا ہے۔ یہ دن نہ صرف خوشی کا موقع ہے بلکہ ہمیں اپنی ذمہ داریوں کا احساس بھی دلاتا ہے۔
انہوں نے کہا کہ 23 مارچ ہمیں اتحاد، قربانی اور عزم کی تجدید کا درس دیتا ہے۔ اس موقع پر ہر پاکستانی کو قومی یکجہتی اور بھائی چارے کے عہد کی تجدید کرنی چاہیے اور پاکستان کی خاطر ایک ہونا چاہیے۔
محسن نقوی کا کہنا تھا کہ ہمیں باہمی اختلافات بھلا کر ملکی مفادات کو مقدم رکھنا ہوگا اور پاکستان کی ترقی و خوشحالی کے لیے متحد ہونا ہوگا۔ زبانی دعوؤں کے بجائے عملی طور پر اتحاد، ایمان اور نظم و ضبط کے اصولوں پر عمل کرنے کا وقت آ چکا ہے۔
انہوں نے مزید کہا کہ پاکستان ہمارے لیے ایک عظیم تحفہ ہے، جس کی حفاظت ہم سب کی ذمہ داری ہے۔ ہمیں قومی یکجہتی اور عزم کے ساتھ پاکستان کو درپیش چیلنجز کا مقابلہ کرنا ہوگا۔
محسن نقوی نے کہا کہ دہشت گردی اور انتشار پھیلانے والوں کی پاکستان میں کوئی جگہ نہیں۔ دہشت گردی اور انتہا پسندی کے خلاف جدوجہد جاری ہے اور اس کا مکمل خاتمہ یقینی بنایا جائے گا۔
آخر میں انہوں نے کہا کہ آئیے، آج کے دن ایک روشن مستقبل کے لیے مل کر کام کرنے کا عہد کریں اور پاکستان کی ترقی کے لیے اپنا بھرپور کردار ادا کریں۔
