چیئرمین جوائنٹ چیفس آف اسٹاف کمیٹی جنرل ساحر شمشاد مرزا نے پیر کو وزیرِ اعظم محمد شہباز شریف سے الوداعی ملاقات کی۔ ملاقات میں وزیرِ اعظم نے جنرل شمشاد مرزا کی پیشہ ورانہ صلاحیتوں، خدمات اور ملک و قوم کے لیے طویل محنت کو سراہا۔
جنرل شمشاد مرزا 27 نومبر 2025 کو اپنی مقررہ مدت مکمل کرنے کے بعد ریٹائر ہو جائیں گے۔ وہ پاکستان کے مسلح افواج کے 18ویں اور آخری چیئرمین جوائنٹ چیفس آف اسٹاف کمیٹی ہوں گے، کیونکہ آئین کی 27ویں ترمیم کے بعد یہ عہدہ ختم کر دیا گیا ہے اور آئندہ کسی نئے چیئرمین کی تقرری نہیں ہوگی۔
جنرل شمشاد مرزا نے اس عہدے پر تین سال خدمات انجام دیں۔ اس عہدے پر سب سے طویل مدت مرحوم جنرل اقبال خان نے گزاری، جو تین سال اور 344 دن تک ذمہ داریاں انجام دیتے رہے۔
پاکستان کے پہلے چیئرمین جوائنٹ چیفس آف اسٹاف کمیٹی جنرل محمد شریف تھے، جنہیں اس وقت کے وزیراعظم ذوالفقار علی بھٹو نے 1 مارچ 1976ء کو مقرر کیا۔ ان کے علاوہ ایڈمرل محمد شریف، ایڈمرل افتخار احمد سروہی نیوی اور پاکستان ایئر فورس سے صرف ایئر چیف مارشل فاروق فیروز خان نے چیئرمین کے عہدے پر خدمات انجام دی ہیں۔
27ویں آئینی ترمیم کے بعد چیئرمین جوائنٹ چیفس آف اسٹاف کمیٹی کا عہدہ ختم ہو گیا ہے، اور اس کے بعد فیلڈ مارشل جنرل عاصم منیر نیا عہدہ چیف آف ڈیفنس فورسز سنبھالیں گے، جو ملک کی عسکری قیادت کے لیے ایک نیا اور اہم عہدہ تصور کیا جا رہا ہے۔
وزیرِ اعظم نے کہا کہ جنرل شمشاد مرزا نے اپنے دور میں بہترین وژن، قیادت اور پیشہ ورانہ مہارت کا مظاہرہ کیا، جو ہمیشہ یاد رکھا جائے گا۔
