متحدہ عرب امارات کے ویزا قوانین میں اہم تبدیلیاں
متحدہ عرب امارات کے ویزا سے متعلق نئی ہدایات جاری کردی گئی ہیں۔ یو اے ای سفارتخانے کے ترجمان کے مطابق ویزا فیس فی کس 69 امریکی ڈالر مقرر کی گئی ہے جبکہ تمام ویزوں کیلئے درخواست آن لائن جمع کرانا ضروری ہوگا۔ترجمان کے مطابق ویزا اپلائی کرنیکے بعد نوٹیفکیشن جاری کیا جائیگا اور درخواست دہندگان کو ضروری دستاویزات اپنے ساتھ رکھنی ہوںگی۔ یو اے ای سفارتخانے کے ترجمان نے بتایا کہ بینک اسٹیٹمنٹ میں کم از کم پانچ ہزار امریکی ڈالر یا مساوی رقم ہونا لازمی ہے۔
سفارتخانے میں درخواست جمع کراتے وقت ہوٹل یا رہائش کا ثبوت فراہم کرنا ہوگاجبکہ کنفرم ریٹرن ٹکٹ بھی دکھانا ضروری ہوگا۔ ویزا کیلئے پاسپورٹ کی میعاد کم از کم چھ ماہ ہونا لازمی ہے اور ویزا فیس مخصوص الفلاح بینک اکاؤنٹ میں جمع کرانی ہوگی۔ اسکے علاوہ بچوں کے ویزا سے متعلق بھی نئی ہدایات جاری کی گئی ہیں۔
5 سال سے کم عمر بچوں کو ویزا سینٹر جانے کی ضرورت نہیں جبکہ چھ سے پندرہ سال کے بچوں کی تصویر ویزا سینٹر میں لی جائیگی۔ پندرہ سال یا اس سے زائد عمر کے بچوں کو ویزا سینٹر جانا لازمی ہوگا۔ ترجمان کے مطابق بائیومیٹرک تصدیق اور ویزا پراسیسنگ کا عمل ویزا سینٹر میں مکمل کیا جائیگا.
