بھارتی اداکارہ نےمبینہ طور پر خودکشی کرلی
کنڑ اداکارہ شوبیتھا شیوانا حیدرآباد کے کونڈا پور علاقے میں اپنے اپارٹمنٹ میں مردہ پائیں گئیں۔ پولیس نے خودکشی کا شبہ کرتے ہوئے تفتیش شروع کردی ہے۔خبر رساں ایجنسی اے این آئی کی رپورٹ کے مطابق پولیس کو شبہ ہے کہ اسکی موت خودکشی کا معاملہ ہے۔ اسکی لاش کو پوسٹ مارٹم کیلئے اسپتال بھیج دیا گیا ہے۔انڈیا میڈیا رپورٹس کا کہنا ہے کہ یہ واقعہ اس وقت سامنے آیا جب پڑوسیوں نے پولیس کو اطلاع دی اور خودکشی کا شبہ ظاہر کیا ۔
پولیس نے مقدمہ درج کر لیا ہے اوراداکارہ کی موت سے متعلق تمام مشکوک حقائق کی چھان بین کررہی ہے۔ پولیس کے مطابق اسکی موت کی صحیح وجہ ابھی تک معلوم نہیں ہوسکی ہے۔
شوبیتھا کی آخری انسٹاگرام پوسٹ سولہ نومبر کی تھی۔ اسکی بے وقت موت نے مداحوں اور انڈسٹری کو صدمے میں ڈال دیا ہے۔ اداکارہ کے مداح یہ جاننا چاہتے ہیں کہ اگر اس نے خود کشی کی بھی ہے تو اسکی وجہ کیا تھی؟ کیا اس نے گھر کی پریشانیوں سے تنگ آکر یہ قدم اٹھایا ہے یا پھر کوئی اور وجہ ہے۔
مداحوں نے افسوسناک خبر پر ردعمل کا اظہار کرتے ہوئے کمنٹس سیکشن میں غم کا اظہار کیا۔ ایک مداح نے لکھا، ”کیا یہ سچ ہے؟ اس نے خودکشی کی؟“ جبکہ ایک اور نے تبصرہ کیا، ”اوم شانتی۔“
کنٹراداکارہ شوبیتھا شیوانا کون تھیں؟
1992 میں بنگلورو میں پیدا ہونیوالی شوبیتھا شیوانا نے چھوٹی عمر سے ہی فنون لطیفہ میں دلچسپی ظاہر کی۔ اس نے اپنی اسکول کی تعلیم بنگلور کے بالڈون گرلز ہائی اسکول میں مکمل کی اور تفریحی صنعت میں قدم رکھنے سے پہلے شہر کے نیشنل انسٹی ٹیوٹ آف فیشن ٹیکنالوجی (NIFT) میں فیشن ڈیزائننگ کی تعلیم حاصل کی۔شوبیتھا کنڑ سنیما کا ایک جانا پہچانا چہرہ تھا، جس نے کئی مشہور فلموں میں کردار ادا کئے، جن میں وندنا، ایراڈونڈلا مورو، جیک پاٹ، اور اے ٹی ایم: قتل کی کوشش شامل ہیں۔ فلموں میں اپنے کام کے علاوہ، وہ ٹیلی ویژن پر بھی اپنی اداکاری کے جوہر دکھاتی رہتی تھیں اور گالی پاتا، منگلا گووری، کوگیلے، کرشنا رکمنی، اور برہماگنتو جیسے ہٹ سیریلز میں نظر آئیں۔
