میانمار میں7.2 شدت کا زلزلہ، تھائی لینڈ بھی لرز اٹھا
میانمار میں جمعہ کے روز شدید زلزلہ آیا، جس کی شدت ریکٹر اسکیل پر 7.2 ریکارڈ کی گئی۔ نیشنل سینٹر فار سیزمولوجی کے مطابق، زلزلے کا مرکز شمالی میانمار میں تھا، جہاں کئی عمارتوں کو نقصان پہنچا اور متعدد افراد زخمی ہوئے۔
زلزلے کے جھٹکے تھائی لینڈ کے دارالحکومت بینکاک تک محسوس کیے گئے، جہاں کئی عمارتوں میں دراڑیں پڑ گئیں، اور لوگ خوفزدہ ہو کر گھروں سے باہر نکل آئے۔ تاہم، مقامی حکام کے مطابق کسی بڑے جانی نقصان کی اطلاع نہیں ملی، لیکن شہریوں کو محتاط رہنے کی ہدایت دی گئی ہے۔
ماہرین ارضیات کے مطابق، ریکٹر اسکیل پر 7.2 شدت کا زلزلہ انتہائی خطرناک ہوتا ہے، جو بڑی تباہی مچا سکتا ہے۔ مختلف شدت کے زلزلے کے اثرات درج ذیل ہو سکتے ہیں:
1 سے 3 شدت: صرف معمولی لرزش، جو سیسموگراف پر ریکارڈ ہوتی ہے۔
4 سے 5 شدت: کھڑکیاں اور دروازے ہل سکتے ہیں، دیواروں پر فریم گر سکتے ہیں۔
6 سے 7 شدت: عمارتوں کو شدید نقصان پہنچ سکتا ہے۔
7 سے 8 شدت: بڑی عمارتیں منہدم ہو سکتی ہیں، زیر زمین پائپ لائنز پھٹ سکتی ہیں۔
8 سے زائد شدت: پل اور عمارتیں تباہ ہو جاتی ہیں، سونامی کا خطرہ پیدا ہو سکتا ہے۔
میانمار کے زلزلے کے بعد لوگ شدید خوف و ہراس میں مبتلا ہو گئے۔ متاثرہ علاقوں میں بجلی کی فراہمی معطل ہوگئی، اور لوگوں نے کھلے مقامات پر پناہ لی۔ حکام نے ریسکیو اور امدادی کارروائیاں شروع کر دی ہیں۔
ماہرین نے خبردار کیا ہے کہ زلزلے کے بعد آفٹر شاکس کا امکان ہے، جن سے مزید نقصان ہو سکتا ہے۔ شہریوں کو محفوظ مقامات پر رہنے اور احتیاطی تدابیر اختیار کرنے کی ہدایت دی گئی ہے۔
بنکاک میں عمارت گرنے سے 43 افراد پھنس گئے، ریسکیو آپریشن جاری
بنکاک کے چٹوچک پارک میں ایک عمارت گرنے سے 43 افراد ملبے تلے پھنس گئے جبکہ 7 افراد زخمی ہوئے ہیں۔
نیشنل انسٹی ٹیوٹ فار ایمرجنسی میڈیسن کے مطابق، حادثے کے وقت 50 افراد عمارت کے اندر موجود تھے۔ امدادی ٹیمیں فوری طور پر موقع پر پہنچ گئیں اور ریسکیو آپریشن جاری ہے۔
حکام کا کہنا ہے کہ ملبے میں دبے افراد کو نکالنے کے لیے ہیوی مشینری استعمال کی جا رہی ہے جبکہ زخمیوں کو قریبی اسپتال منتقل کر دیا گیا ہے۔
مزید اپڈیٹس کے لیے ہمارے ساتھ رہیے۔
