کینیڈا:مسافر طیارہ لینڈنگ کے دوران الٹ گیا
کینیڈا میں ڈیلٹا ایئرلائن کا مسافر بردار طیارہ حادثے کا شکار ہوکر الٹ گیا جس سے کم از کم اٹھارہ مسافر زخمی ہوگئے جن میں سے تین کی حالت نازک بتائی جاتی ہے۔بین الاقوامی میڈیا کے مطابق امریکا سے پرواز بھرنیوالے طیارے کو حادثہ کینیڈا کے شہر ٹورنٹو کے پیئرسن ایئرپورٹ پر پیش آیا۔حادثے کے وقت جہاز میں اسی مسافر سوار تھے جنھیں واقعے کے فوراً بعد جہاز سے ریسکیو کیا گیا۔
سوشل میڈیا پر وائرل ایک ویڈیو میں مسافروں کو الٹنے والے جہاز سے نکلتے دیکھا جاسکتا ہے جب کہ ریسکیو اہلکار تباہ شدہ جہاز پر فائر بریگیڈ سے پانی پھینک رہے ہیں۔حادثے کے بعد ایئرپورٹ کے دو رن ویز کو پروازوں کیلیے بند کردیا گیا ہے جبکہ واقعے کی تحقیقات بھی شروع کردی گئی ہے ابتدائی معلومات کے مطابق جہاز الٹنے کا واقعہ خراب موسم اور رن وے پر برفباری کیوجہ سے پیش آیا۔
