پاکستان کی پہلی کرپٹو کونسل کا مستقبل کیا ہے؟
اسلام آباد: سینیٹ کی قائمہ کمیٹی برائے انفارمیشن ٹیکنالوجی اور ٹیلی کمیونیکیشن نے وزارت آئی ٹی و ٹیلی کام (MOITT) سے کرپٹو کرنسی کو ریگولیٹ کرنے کے لیے ایک خصوصی کونسل کے قیام اور حالیہ آغاز کیے گئے مقامی جنریٹو اے آئی ٹول ’ذہانت AI‘ کے حوالے سے تفصیلی بریفنگ طلب کرلی ہے۔
سینیٹ سیکرٹریٹ کی جانب سے جاری نوٹس کے مطابق کمیٹی کا آئندہ اجلاس 7 مئی 2025 کو اسلام آباد میں منعقد ہوگا۔ ایجنڈے کے اہم نکات میں ’ذہانت AI‘ کا مبینہ آغاز شامل ہے، جس کا اعلان وزیر آئی ٹی نے کیا تھا، لیکن بعد ازاں نیشنل انفارمیشن ٹیکنالوجی بورڈ (NITB) کے سی ای او نے اس کی تردید کی تھی۔ کمیٹی اس معاملے پر وضاحت طلب کرے گی اور وزارت کے کردار، اعلانات اور ٹیکنالوجی سے متعلق پیش رفت میں شفافیت کا جائزہ لے گی۔
سینیٹر پلوشہ محمد زئی خان کی سربراہی میں کمیٹی پاکستان کے تیزی سے بدلتے ڈیجیٹل منظرنامے کے تناظر میں کئی اہم امور پر غور کرے گی۔ ایجنڈے کا ایک اہم جزو ’مصنوعی ذہانت کا ضابطہ بل 2024‘ ہے، جسے سینیٹر ڈاکٹر افنان اللہ خان نے پیش کیا۔ یہ بل، جو پہلی بار ستمبر 2023 میں سینیٹ میں پیش ہوا تھا، ملک میں اے آئی کی ترقی اور اطلاق کے لیے اخلاقی و قانونی فریم ورک مہیا کرے گا۔
اس اجلاس میں وزارت آئی ٹی اور پاکستان ٹیلی کمیونیکیشن اتھارٹی (PTA) کے حکام کو ایل ڈی آئی (لانگ ڈسٹنس انٹرنیشنل) اور ایف ایل ایل (فکسڈ لائن لوکل) لائسنسز کی تجدید سے متعلق بریفنگ کے لیے بھی طلب کیا گیا ہے۔
کمیٹی ڈیجیٹل نیشن پاکستان ایکٹ 2025 کی منظوری کے بعد اس پر عمل درآمد کی پیش رفت کا بھی جائزہ لے گی، جبکہ ڈیجیٹل ڈویلپمنٹ انویسٹمنٹ فورم (DDIF) میں پاکستان کی شرکت، خاص طور پر مقامی سافٹ ویئر کمپنیوں کے لیے بین الاقوامی مواقع اور تعاون سے متعلق اپ ڈیٹس بھی حاصل کرے گی۔
