حکومت کا حج پیکجز میں مزید کمی کا اعلان
وزارت مذہبی امور نے حج 2025 کے ’طویل اور مختصر‘ دورانیے کے پیکجز کی قیمتوں میں کمی کا اعلان کیا ہے۔ یہ کمی سعودی عرب میں کئے گئے معاہدوں کیوجہ سے ہوئی ہے، جس سے ھوٹل اور رہائش کے اخراجات میں قابلِ ذکر بچت ہوئی ہے۔وزیر مذہبی امور چوہدری سالک حسین نے پریس کانفرنس میں اعلان کیا کہ چالیس دنوں پر محیط طویل دورانیے کے حج پیکیج کے اخراجات میں مزید پچیس ہزار جب کہ 25 دنوں پر محیط مختصر دورانیے کے حج پیکیج میں مزید پچاس ہزار روپے کی کمی کر دی گئی ہے۔
اس سے قبل 29 جنوری 2025 کو وزارت مذہبی امور کیجانب سے جاری بیان میں طویل دورانیے کے حج پیکج کی فی کس قیمت دس لاکھ 75000روپے جب کہ مختصر دورانیے کے پیکج کی قیمت گیارہ لاکھ پچاس ہزار روپے طے کی گئی تھی۔نئے اعلان کے بعد طویل دورانیے کے حج پیکج کی کل قیمت فی کس دس لاکھ پچاس ہزار جبکہ مختصر دورانیے کے حج پیکج کی کل قیمت گیارہ لاکھ روپے کر دی گئی ہے۔ سعودی عرب نے 2025 میں پاکستان کیلیے 1 لاکھ 79 ہزار 210 حجاج کا کوٹہ مختص کیا ہے جنھیں سرکاری اور نجی اسکیموں میں برابر تقسیم کیا گیا ہے۔
وفاقی وزیر مذہبی امور کے مطابق طویل دورانیے کے حج پیکیج میں تیسری قسط چار لاکھ پچاس ہزار روپے جب کہ پچیس دنوں پر محیط حج پیکیج کی تیسری قسط پانچ لاکھ روپے ادا کرنا ہوگی۔ تیسری قسط نامزد بینکوں میں چھ فروری تا 14 فروری جمع کروانا لازم ہے۔
پاکستان اور سعودی عرب میں حج معاہدہ، کیا نئی سہولیات ملے گیں؟
سعودی عرب اور پاکستان کے درمیان حج 2025 کیلیے معاہدہ طے پا گیا ہے۔ معاہدے پر وفاقی وزیر مذہبی امور چوہدری سالک حسین اور سعودی وزیر حج ڈاکٹر توفیق بن فوزان الربیعہ نے دستخط کئے۔ رواں برس 1 لاکھ 79 ہزار 210 پاکستانی فریضہ حج ادا کریںگے۔ دونوں جانب سے پاکستانی عازمین حج کو بہترین سہولیات فراہم کرنے پر اتفاق کیا گیا ہے۔ترجمان وزارت مذہبی امور نے بتایا کہ پاکستانی حجاج کو منیٰ میں خصوصی جگہ دی جائیگی اور نرخ بھی کم ہوںگے۔
سفر حج کو مزید قابل رسائی، آسان اور آرام دہ بنانے کیلیے بیس سے پچیس دن کا مختصر حج پروگرام متعارف کرایا گیا ہے۔ہر عازم حج کو خصوصی طور پر ڈیزائن کیا گیا ایک بیگ ملے گا جس میں پاکستانی پرچم، شناخت کے لیے کیو آر کوڈ اور متعلقہ معلومات ہونگی۔ خصوصی موبائل ایپ سے عازمین حج کیلیے تمام معلومات ان کے موبائل فونز پر دستیاب ہوںگی۔
عازمین اپنے حج گروپ کی معلومات، تربیتی شیڈول، فلائٹ کی معلومات، سعودی عرب میں اپنی رہائش، ادائیگی اور دوران حج مقامات کے لائیو نقشے و لوکیشنز سے خود کو آگاہ رکھ سکیں گے۔
