وزیراعظم کا 78ویں یوم آزادی پر پیغام
پاکستان کے 78ویں یوم آزادی پر وزیراعظم شہباز شریف نے کہا ہے کہ وہ پاکستانی قوم کو دل کی گہرائیوں سے مبارکباد پیش کرتے ہیں۔اپنے بیان میں وزیراعظم نے کہا کہ پوری قوم تحریک پاکستان کے ان گمنام ہیروز کی قربانیوں کو خراج عقیدت پیش کرتی ہے جنہوں نے آزاد مملکت کے قیام کے لیے انتھک جدوجہد کی۔شہباز شریف نے کہا کہ پاکستان ہمارے آباؤ اجداد کی بے مثال قربانیوں کے نتیجے میں دنیا کے نقشے پر ابھرا،
پاکستان نے گزشتہ کئی دہائیوں کے دوران اہم سنگ میل عبور کیے ہیں۔وزیراعظم نے کہا کہ قدرتی آفات اور معاشی و سماجی مشکلات میں پاکستانی قوم کی ہمت اور استقامت کا امتحان لیا گیا۔ان کا مزید کہنا تھا کہ میں بیرون ملک مقیم پاکستانیوں کے پاکستان کی ترقی میں کلیدی کردار کو سراہتا ہوں، مجھ سمیت پوری قوم کو آپ کی محنت اور کامیابیوں پر فخر ہے۔وزیراعظم نے کہا کہ ہماری مسلسل توجہ پاکستان کی معاشی ترقی اور معاشی استحکام پر ہے، وسیع قدرتی وسائل اور نوجوان افرادی قوت ہمارا اصل اثاثہ اور سب سے بڑی طاقت ہیں۔
انہوں نے کہا کہ ہم وسیع پیداواری صلاحیت کے حامل شعبوں میں سرمایہ کاری کو راغب کرنے کے لیے اقدامات کر رہے ہیں، اس سے روزگار کے مواقع پیدا ہوں گے اور صنعت کاری میں تیزی آئے گی، بین الاقوامی معیارات ہماری حکومت کی اولین ترجیحات میں شامل ہیں۔ بشمول تعلیم اور ہنر کی فراہمی۔وزیر اعظم شہباز شریف نے کہا کہ وہ ذاتی طور پر پاکستان کے پورے ایکو سسٹم کی ڈیجیٹائزیشن کی نگرانی کر رہے ہیں، وہ پاکستان کے ٹیکس کی بنیاد کو وسیع کرنے کی قومی مہم کی بھی ذاتی طور پر نگرانی کر رہے ہیں، قلیل عرصے میں ہمارے ملک کی ترقی اور خوشحالی کے لیے۔ کوششوں کے مثبت نتائج آنا شروع ہو گئے ہیں۔
