غیر ملکیوں کیلئے سکیورٹی پلان پر غفلت کی گنجائش نہیں ، محسن نقوی
وزیر داخلہ نے کہا ہے کہ غیر ملکیوں کیلئے سیکیورٹی پلان پر کسی قسم کی غفلت کی گنجائش نہیں ۔وزیر داخلہ کی زیر صدارت اجلاس میں غیر ملکیوں خصوصاً چینی شہریوں کی حفاظت کیلئے کئے گئے حکومتی اقدامات کا جائزہ لیا گیا۔ اجلاس میں ملک میں امن و امان کی مجموعی صورتحال پر بھی غور کیا گیا ۔
وزیر داخلہ نے غیر ملکیوں سے متعلق سکیورٹی پلان کے ایس او پیز پر من و عن عملدرآمد کی ہدایت کرتے ہوئے کہا کہ وضع کردہ پلان کی ہر سطح پر باقاعدہ مانیٹرنگ کی جائے۔ ملک دشمن عناصر کے مذموم عزائم خاک میں ملانے کیلئے متعلقہ ادارے قریبی رابطہ رکھیں۔وزارت داخلہ سمیت دیگر متعلقہ اداروں کی جانب سے سکیورٹی پلان اور مجموعی صورتحال پر وزیر داخلہ کو بریفنگ دی گئی۔
