وزیراعظم نے سمندر پار پاکستانیوں کیلئے تاریخی قدم اٹھالیا
پرائم منسٹر شہباز شریف نے سمندر پار پاکستانیوں کیلئے تاریخی قدم اٹھالیا۔ شہباز شریف نے اسلام آباد میں بونا-راست کنیکٹیوٹی منصوبے کا نفاذ کردیا۔ منصوبے کے تحت پاکستان کے ادائیگیوں کے ڈیجیٹل نظام راست کو عرب مانیٹری فنڈ کے تحت قائم بونا سے جوڑا جا رہا ہے.پرائم منسٹر شہباز شریف کے ویژن کے تحت سمندر پار پاکستانیوں کو رقوم بھجوانے کے تیز، مؤثر اور کم لاگت منصوبے کا نفاذ شروع ہوگیا۔ راست اقدام کو بونا سے جوڑنے سے عرب ممالک میں مقیم لاکھوں پاکستانیوں کو تیز، مؤثر اور کم لاگت میں رقوم بھجوانے کی سہولت میسر ہوگی۔منصوبے سے نہ صرف سمندر پار مقیم پاکستانیوں کے لیے رقوم کی منتقلی میں آسانی پیدا ہوگی بلکہ اس سے ترسیلات زر میں بھی اضافہ ہوگا۔ بونا-راست کنیکٹیوٹی کے تحت عرب ممالک میں مقیم پاکستانی با آسانی ڈیجیٹل طریقے سے رقوم کو اپنے پیاروں کے پاس بھیج سکیں گے.
اس موقع پر خطاب کرتے ہوئے پرائم منسٹر نے کہا کہ یہ اہم اقدام جدید ڈیجیٹل انداز میں عرب دنیا کیساتھ ہمارے تاریخی تعلقات کو مزید مضبوط کریگا.انھوں نے کہا کہ اس تاریخی اقدام کا مقصد عرب دنیا میں ہمارے ساتھی پاکستانیوں کو اپنی رقم جلد وطن واپس بھیجنے میں سہولت فراہم کرنا ہے۔پرائم منسٹر نے نشاندہی کی کہ یہ پاکستان کا پہلا کراس بارڈر فوری ادائیگی کا نظام ہے جو ترسیلات زر کو مزید سستی اور قابل رسائی بنائیگا.اقتصادی چیلنجوں کا ذکر کرتے ہوئے شہباز شریف نے کہا کہ وہ جلد ہی پانچ سالہ گھریلو اقتصادی پروگرام کا اعلان کرینگے. پچھلے چند مہینوں سے اس پر اسٹیک ہولڈرز کیساتھ بات چیت ہوئی ہے۔ انھوں نے کہا کہ یہ پروگرام معیشت اور زراعت اور آئی ٹی سمیت مختلف شعبوں کی بہتری کیلئے اقدامات کا تصور کریگا.
