وزیراعظم کا ایک اہم اختیار ختم
ذرائع سے موصول ہونے والی تازہ ترین معلومات کے مطابق وزیراعظم پاکستان کا ماہرین اور پیشہ ور افراد کی آسامیاں بنانے کا اختیار ختم کر دیا گیا ہے۔ وفاقی کابینہ نے ان اسامیاں بنانے کا وزیراعظم کا اختیار ختم کرنے کی سفارشات کی منظوری دے دی اور اب یہ ذمہ داری وزراء، وزرائے مملکت، مشیروں اور سیکرٹریز کو سونپ دی گئی ہے۔
وزارتوں اور ڈویژنوں میں ماہرین اور پیشہ ور افراد کی تقرری کا منصوبہ ہے اور یہ آسامیاں اب وزارت خزانہ اور اسٹیبلشمنٹ ڈویژن کی مشاورت سے تخلیق کی جائیں گی۔ کنسلٹنٹس کی تقرری متعلقہ وزیر، وزیر مملکت یا مشیر کی منظوری سے کی جائے گی۔ ایسوسی ایٹس اور ینگ پروفیشنلز کے معاملے میں متعلقہ سیکرٹری کی منظوری ضروری ہو گی۔ تاہم ٹیکنیکل ایڈوائزرز کی تقرری کے لیے وزیراعظم کی منظوری درکار ہوگی۔
تقرری کا عمل مسابقتی عمل اور خصوصی سلیکشن بورڈ کے ذریعے مکمل کیا جائے گا۔ اہم تقرریوں کے معاملے پر نمایاں پیش رفت ہوئی ہے اور یہ نیا نظام اس بات کو یقینی بنائے گا کہ تقرریاں منصفانہ اور شفاف طریقے سے کی جائیں۔
