وفاقی وزیر داخلہ محسن نقوی کا ماؤں کے عالمی دن پر خصوصی پیغام
اسلام آباد: وفاقی وزیر داخلہ محسن نقوی نے ماؤں کے عالمی دن کے موقع پر اپنے پیغام میں کہا کہ ماں جیسی ہستی اس دنیا میں سب سے بڑی نعمت ہے۔ انہوں نے کہا کہ ماں سے محبت کو کسی ایک دن تک محدود نہیں کیا جا سکتا، کیونکہ یہ محبت گود سے لے کر تاقیامت تک جاری رہتی ہے۔
وزیر داخلہ نے مزید کہا کہ “سب سے پیارا اور مٹھاس سے بھرا لفظ ‘ماں’ ہے، اور ماں پیار، خلوص اور شفقت کا دوسرا نام ہے۔” انہوں نے کہا کہ ماں جیسے پاکیزہ رشتہ کا کوئی نعم البدل نہیں اور ماں کی گود میں گزارے گئے حسین ترین لمحات دنیا کے قیمتی ترین بستر پر بھی نصیب نہیں ہوتے۔
محسن نقوی نے یہ بھی کہا کہ “ماں کی دعا انسان کو فرش سے عرش تک لے جاتی ہے” اور اپنے ذاتی تجربات کا ذکر کرتے ہوئے کہا کہ اللہ تعالیٰ کے فضل و کرم سے جس مقام پر ہوں، وہ سب والدہ محترمہ کی دعاؤں کی بدولت ہے۔ انہوں نے کہا کہ وہ پُر یقین ہیں کہ ان کی مرحومہ والدہ کی دعائیں آج بھی ان کے ساتھ ہیں۔
وفاقی وزیر نے تمام ماؤں کی عظمت کو سلام پیش کیا اور خاص طور پر اُن ماؤں کو خراجِ عقیدت پیش کیا جو اپنے بیٹوں کو وطن کے لیے قربانی دینے پر آمادہ کرتی ہیں۔ آخر میں، وزیر داخلہ نے دعا کی کہ اللہ تعالیٰ ہر ماں کو سلامت رکھے۔
