بھارت کو منہ توڑ جواب ، وزیراعظم کا آج یومِ تشکر منانے کا اعلان
وزیراعظم شہباز شریف نے بھارتی جارحیت کا منہ توڑ جواب دینے اور آپریشن بنیان المرصوص کی کامیابی پر آج (اتوار) ملک بھر میں یومِ تشکر منانے کا اعلان کر دیا۔
وزیراعظم نے کہا کہ یہ دن اللہ تعالیٰ کے حضور سجدہ شکر بجا لانے، افواجِ پاکستان کی بے مثال بہادری کو سلام پیش کرنے، اور پوری قوم کے اتحاد و حوصلے کی داد دینے کا دن ہے۔ انہوں نے کہا کہ آپریشن بنیان المرصوص نے دشمن کی جارحیت کو مؤثر، منہ توڑ اور بروقت جواب دے کر پاکستان کی برتری ثابت کی۔
شہباز شریف کا کہنا تھا کہ پاکستان نے صبر و تحمل کا مظاہرہ کیا، مگر اپنے دفاع کے لیے مکمل تیاری کے ساتھ میدان میں آیا اور ہر محاذ پر سرخرو رہا۔
وزیراعظم نے علما کرام اور عوام سے اپیل کی کہ وہ آج پورے ملک میں اجتماعی دعاؤں اور نوافل کا اہتمام کریں، اللہ رب العزت کا شکر ادا کریں اور شہدا و غازیوں کے لیے خصوصی دعائیں کریں۔
انہوں نے کہا کہ افواج پاکستان کی قربانیوں کو کبھی فراموش نہیں کیا جا سکتا، قوم ان کے شانہ بشانہ کھڑی ہے اور ہمیشہ رہے گی۔
