افغانستان دہشتگردوں کی محفوظ پناہ گاہ بن چکا! آرمی چیف کا بڑا انکشاف
پاک فوج کے سربراہ جنرل سید عاصم منیر نے بنوں کا دورہ کیا، جہاں کور کمانڈر پشاور نے ان کا استقبال کیا۔ اس دوران آرمی چیف کو جاری آپریشنز اور علاقے کی مجموعی سیکیورٹی صورتحال پر تفصیلی بریفنگ دی گئی۔
پاک فوج کے شعبہ تعلقات عامہ (آئی ایس پی آر) کے مطابق آرمی چیف نے سی ایم ایچ بنوں میں زخمی فوجیوں کی عیادت کی اور ان کے حوصلے اور عزم کو سراہا۔ اس موقع پر انہوں نے دہشت گرد حملے میں جاں بحق ہونے والے شہریوں کے اہل خانہ سے دلی تعزیت کا اظہار کیا۔
جنرل عاصم منیر نے بنوں میں فوجی جوانوں سے خطاب کرتے ہوئے ان کے بہادرانہ اقدامات کی تعریف کی اور کہا کہ پاک فوج ملک کی سلامتی اور استحکام کو یقینی بنانے کے لیے دہشت گردی کے خلاف اپنا کردار ادا کرتی رہے گی۔ انہوں نے یقین دہانی کرائی کہ حملے کے منصوبہ سازوں اور سہولت کاروں کو جلد انصاف کے کٹہرے میں لایا جائے گا۔
آرمی چیف نے زور دیا کہ دہشت گرد گروہ، بشمول فتنہ الخوارج، پاکستان کے خلاف افغان سرزمین سے کارروائیاں کر رہے ہیں، اور دہشت گرد حملوں میں غیر ملکی ہتھیاروں کا استعمال اس بات کا ثبوت ہے کہ افغانستان ایسے عناصر کی محفوظ پناہ گاہ بنا ہوا ہے۔
انہوں نے واضح کیا کہ کسی بھی ادارے کو پاکستان کے امن و استحکام میں خلل ڈالنے کی اجازت نہیں دی جائے گی، اور اس جنگ میں قومی اتحاد ناگزیر ہے۔ پاک فوج عوام کے تحفظ اور سلامتی کو یقینی بنانے میں کوئی کسر نہیں اٹھا رکھے گی
