ازبک نائب وزیر دفاع کی جنرل ساحر شمشاد سے ملاقات
میجر جنرل برخانوف اخمد جمالووچ، نائب وزیر دفاع اور جمہوریہ ازبکستان کی فضائی دفاعی افواج اور فضائیہ کے کمانڈر نے جوائنٹ اسٹاف ہیڈ کوارٹرز راولپنڈی میں جوائنٹ چیفس آف اسٹاف کمیٹی کے چیئرمین جنرل ساحر شمشاد مرزا، NI (M) سے ملاقات کی۔
ملاقات کے دوران دونوں فریقین نے دوطرفہ سٹریٹجک دلچسپی کے امور پر تبادلہ خیال کیا جس میں علاقائی سلامتی کی ابھرتی ہوئی صورتحال پر خصوصی توجہ دی گئی۔ دونوں اطراف نے دوطرفہ فوجی تعاون کو مضبوط بنانے میں گہری دلچسپی کا اظہار کیا۔
معزز مہمان نے پاکستان کی مسلح افواج کی پیشہ وارانہ مہارت کی تعریف کی اور دہشت گردی کے خلاف جنگ میں ان کی قربانیوں کا اعتراف کیا۔
قبل ازیں، جوائنٹ سٹاف ہیڈ کوارٹر پہنچنے پر، تینوں افواج کے چاق و چوبند دستے نے معزز مہمان کو گارڈ آف آنر پیش کیا۔
