نویں کثیر القومی مشق امن 2025 کا اختتام، انٹرنیشنل فلیٹ ریویو کا شاندار انعقاد
پاک بحریہ کے زیر اہتمام نویں کثیرالقومی مشق امن 2025 شمالی بحیرہ عرب میں انٹرنیشنل فلیٹ ریویو کے شاندار انعقاد کے ساتھ اختتام پذیر ہوگئی۔ مشق میں تقریباً 60 ممالک نے بحری جنگی جہازوں، ایئرکرافٹ، میرینز، اسپیشل آپریشن فورسز اور مبصرین کے ہمراہ شرکت کی۔
انٹرنیشنل فلیٹ ریویو کے دوران پاک بحریہ اور غیر ملکی جنگی بحری جہازوں نے “امن فارمیشن” کا شاندار مظاہرہ کیا۔ اس موقع پر چیف آف آرمی اسٹاف جنرل سید عاصم منیر مہمان خصوصی تھے، جنہوں نے مختلف آپریشنل مشقوں کا مشاہدہ کیا۔ ان کے ہمراہ چیف آف دی نیول اسٹاف ایڈمرل نوید اشرف، گورنر سندھ، وزیراعلیٰ سندھ اور وفاقی وزیر برائے سمندری امور بھی شریک تھے۔
مشق امن 2025 “امن کے لیے متحد” کے موٹو کے تحت منعقد ہوئی، جس نے پاکستان کے امن، بحری تحفظ اور باہمی تعاون کے عزم کو اجاگر کیا۔ مشق کے دوران پاکستان نیوی اور پاکستان ایئر فورس کے طیاروں نے شاندار فلائی پاسٹ پیش کیا، جس کے بعد بحری جہازوں کی جانب سے مین اینڈ چیئر شپ کا مظاہرہ کیا گیا۔
مہمان خصوصی نے پاک بحریہ کو کامیاب میزبانی پر مبارکباد دی اور عالمی بحری افواج کی شرکت کو سراہتے ہوئے کہا کہ “امن 2025 ایک ایسا فورم بن کر سامنے آیا ہے، جس نے تمام عالمی جغرافیائی طاقتوں کو ‘محفوظ سمندر، خوشحال مستقبل‘ کے مشترکہ مقصد کے تحت یکجا کیا۔”
مشق کے ساتھ منعقد ہونے والے پہلے امن ڈائیلاگ نے عالمی بحری قیادت کو مشترکہ بحری مسائل پر تبادلہ خیال کا موقع فراہم کیا۔ اختتامی تقریب میں شریک ممالک کے سفیروں، ہائی کمشنرز، غیر ملکی بحری افواج کے سربراہان، سینئر ملٹری آفیسرز اور نیول اتاشیوں نے بھی شرکت کی۔
مشق کا اختتام روایتی امن فارمیشن کے ساتھ ہوا، جو عالمی بحری افواج کے باہمی تعاون اور بحری تحفظ کے اجتماعی عزم کی علامت ہے۔
