پاسپورٹ بنوانے والوں کے لیے بڑی رکاوٹ دور
پاکستان میں پاسپورٹ دفاتر کے باہر سرگرم ایجنٹ مافیا کیخلاف کریک ڈاون کی شروعات کر دی گئی ہے۔ڈی جی پاسپورٹس مصطفیٰ جمال قاضی کیجانب سے ایجنٹ مافیا کے خلاف کارروائیوں کا اعلان کرتے ہوئے ملک بھر میں سخت نگرانی اور کڑی کارروائیاں کرنیکے احکامات جاری کردئیے گئے ہیں۔تفصیلات کے مطابق ڈی جی پاسپورٹس نے تمام ریجنل دفاتر کو ہدایت دی ہے کہ وہ روزانہ کی بنیاد پر مانیٹرنگ رپورٹ ہیڈ کوارٹرز میں جمع کروائیں۔اس کیساتھ ہی خفیہ ٹیموں کیجانب سے سرپرائز وزٹس بھی کئے جائیں،
تاکہ ایجنٹ مافیا کی غیر قانونی سرگرمیوں کو روکا جا سکے۔اس سلسلے میں لاھور کے پاسپورٹ دفتر گارڈن کے باہر کارروائی کی گئی، جہاں ایک ایجنٹ کو گرفتار کر کے اس کے خلاف مقدمہ درج کر لیا گیا ہے۔ پولیس نے ایجنٹ کو حراست میں لے لیا اور اس سے مزید تحقیقات شروع کر دی ہیں۔ڈی جی پاسپورٹس مصطفیٰ جمال قاضی نے شہریوں سے اپیل کی ہے کہ وہ ایجنٹ مافیا کے خلاف حکومت کے اقدامات میں تعاون کریں تاکہ ملک بھر میں پاسپورٹ کے حصول کو شفاف اور آسان بنایا جا سکے۔
انھوں نے مزید کہا کہ پاسپورٹ کی فراہمی میں تاخیر کی شکایات کا تدارک بھی کر لیا گیا ہے، اب شہریوں کو مقررہ وقت سے بھی کم عرصے میں پاسپورٹ فراہم کئے جا رہے ہیں۔انکا کہنا تھا کہ ملک بھر میں پاسپورٹ دفاتر کا دائرہ کار وسیع کیا جا رہا ہے تاکہ شہریوں کے لیے بغیر کسی رکاوٹ کے آسانی سے پاسپورٹ کے حصول کو ممکن بنا سکیں۔
