صدر مملکت کا نیشنل ایرو اسپیس سائنس اینڈ ٹیکنالوجی پارک کا دورہ، پاک فضائیہ کی کاوشوں کو سراہا
صدر مملکت آصف علی زرداری نے پاک فضائیہ کے زیر اہتمام نیشنل ایرو اسپیس سائنس اینڈ ٹیکنالوجی پارک کا دورہ کیا، جہاں انہیں منصوبے کے بارے میں تفصیلی بریفنگ دی گئی۔پاک فضائیہ کے سربراہ ایئر چیف مارشل ظہیر احمد بابر سدھو بھی اس موقع پر موجود تھے۔ بریفنگ میں بتایا گیا کہ سائنس اینڈ ٹیکنالوجی پارک پاک فضائیہ کے ترقیاتی سفر میں ایک اہم سنگ میل ہے اور یہ منصوبہ قومی اہمیت کا حامل ہے۔مزید بتایا گیا کہ یہ پارک پاکستان میں علم اور ٹیکنالوجی پر مبنی معیشت کی بنیاد رکھنے میں کلیدی کردار ادا کرے گا۔
اس کا مقصد خلائی، سائبر، آئی ٹی، مصنوعی ذہانت اور ایرو اسپیس کے شعبوں میں نجی اور سرکاری اداروں کو جوڑنا ہے۔بریفنگ میں کہا گیا کہ یہ سائنس اینڈ ٹیکنالوجی پارک دنیا کے بہترین ایرو اسپیس، سائبر اور آئی ٹی کلسٹرز میں سے ایک بننے کے لیے پوری طرح تیار ہے اور یہ تحقیق، تیاری اور اختراعی مراکز کے ساتھ قومی منظرنامے کو بدل دے گا۔صدر مملکت آصف علی زرداری نے پاک فضائیہ اور اس کے ہنر مند اہلکاروں کی تعریف کرتے ہوئے نیشنل ایرو اسپیس سائنس اینڈ ٹیکنالوجی پارک میں جدید ترین تکنیکی ماحولیاتی نظام کو سراہا۔
انہوں نے جدید جنگی چیلنجوں سے نمٹنے اور قومی تزویراتی اہمیت کے حامل اس منصوبے کو بے مثال مدت میں مکمل کرنے پر پاک فضائیہ کی قیادت کے وژن اور فعالیت کی بھی تعریف کی۔
