اسلام آباد سمیت متعدد علاقوں پر بادلوں کا قبضہ، طوفانی بارش کی پیشگوئی
محکمہ موسمیات کے مطابق اسلام آباد سمیت ملک کے مختلف علاقوں میں تیز ہواؤں، آندھی اور گرج چمک کے ساتھ بارش کا امکان ہے، جب کہ بیشتر میدانی علاقوں میں موسم شدید گرم اور خشک رہے گا۔
محکمہ موسمیات کے مطابق اسلام آباد، راولپنڈی، مری، گلیات، اٹک، چکوال، جہلم اور سرگودھا میں آندھی اور بارش متوقع ہے۔ پنجاب کے دیگر شہروں خوشاب، منڈی بہاؤالدین، حافظ آباد، گجرات، گوجرانوالہ، سیالکوٹ، نارووال، لاہور، فیصل آباد، شیخوپورہ، جھنگ، نور پور تھل، میانوالی اور بھکر میں بھی بعض مقامات پر گرج چمک کے ساتھ بارش کی پیشگوئی کی گئی ہے۔
بالائی خیبرپختونخوا کے اضلاع چترال، دیر، سوات، کوہستان، بٹگرام، مانسہرہ، ایبٹ آباد، پشاور، صوابی، نوشہرہ، چارسدہ، کوہاٹ، ہنگو، کرک، کرم، خیبر، وزیرستان، بنوں اور ڈیرہ اسماعیل خان میں بھی بارش کا امکان ہے۔
محکمہ موسمیات کے مطابق گلگت بلتستان اور آزاد کشمیر میں بھی تیز ہواؤں اور گرج چمک کے ساتھ بارش متوقع ہے، جب کہ بلوچستان کے بیشتر اضلاع میں موسم بدستور شدید گرم اور خشک رہنے کا امکان ہے۔
