حیفا جل اٹھا، تل ابیب لرز گیا: ایران کا اب تک کا سب سے بڑا حملہ،درجنوں ہلاک
ایران اور اسرائیل کے درمیان جاری کشیدگی شدت اختیار کرتی جارہی ہے، پیر کی صبح ایران نے اسرائیل کے مختلف شہروں پر بڑا میزائل حملہ کیا، جس میں تقریباً 100 میزائل فائر کیے گئے، ان حملوں کے نتیجے میں تل ابیب، مقبوضہ بیت المقدس اور حیفہ سمیت کئی شہر دھماکوں سے گونج اٹھے۔
حیفا میں ایک پاور پلانٹ پر میزائل گرنے سے شدید آگ بھڑک اٹھی، جس کے بعد اسرائیل کے وسطی علاقوں میں بجلی کی فراہمی معطل ہو گئی۔ تل ابیب اور دیگر شہروں میں بھی راکٹ گرنے سے متعدد عمارتوں کو نقصان پہنچا اور جانی نقصان کی اطلاعات موصول ہو رہی ہیں۔
ایران کی جانب سے اسرائیل پر تازہ ترین میزائل حملوں میں تل ابیب اور حیفہ کو شدید نشانہ بنایا گیا ہے، جہاں کئی میزائل گرنے کی اطلاعات موصول ہوئی ہیں۔ اسرائیلی میڈیا کے مطابق یہ موجودہ جنگ کے دوران اب تک کا سب سے شدید حملہ ہے۔
اسرائیلی دفاعی حکام نے تصدیق کی ہے کہ ایران کی سرزمین سے داغے گئے درجنوں بیلسٹک میزائل اسرائیل کی فضائی حدود میں داخل ہوئے، جن میں سے کئی کو روکنے کی کوشش کی گئی۔ تاہم میزائلوں کی تعداد اور شدت نے اسرائیلی دفاعی نظام پر شدید دباؤ ڈال دیا۔
حیفا میں واقع اہم پاور پلانٹ ایک ایرانی میزائل کی زد میں آ کر آگ کی لپیٹ میں آ گیا، جس کے نتیجے میں وسطی اسرائیل میں بڑے پیمانے پر بجلی کی فراہمی منقطع ہو گئی ہے۔ شہری علاقوں میں اندھیرا چھا گیا اور عوام میں خوف و ہراس پھیل گیا۔
اسرائیلی آرمی ریڈیو کے مطابق، تل ابیب اور حیفا پر ہونے والے حالیہ حملوں کے دوران ایران کے کم از کم 10 میزائل اسرائیلی دفاعی نظام کی گرفت سے بچ نکلے اور اپنے اہداف پر گرے۔
میزائل حملوں سے تل ابیب اور حیفا کے مختلف علاقوں میں شدید دھماکے سنے گئے، جب کہ کئی عمارتوں کو نقصان پہنچنے اور شہریوں کے زخمی ہونے کی اطلاعات بھی سامنے آ رہی ہیں۔
میڈیا رپورٹس کے مطابق، صرف حیفہ میں ایرانی حملے سے 4 افراد زخمی ہوئے، جب کہ مجموعی طور پر اب تک 14 افراد کے ہلاک اور 300 سے زائد کے زخمی ہونے کی تصدیق ہو چکی ہے، اتوار کی رات بھی ایران نے اسرائیل پر میزائلوں کی بارش کی تھی، جس سے کئی عمارتیں منہدم ہو گئیں تھیں۔
ایرانی میڈیا نے دعویٰ کیا ہے کہ بن گوریان ایئرپورٹ کو بھی میزائلوں کا نشانہ بنایا گیا ہے، تاہم اسرائیلی حکام کا کہنا ہے کہ ان کی فضائیہ نے کئی ایرانی ڈرونز اور میزائلوں کو راستے میں ہی تباہ کر دیا۔
ایرانی فوج نے سخت وارننگ دیتے ہوئے کہا ہے کہ اسرائیل کا کوئی کونا رہنے کے قابل نہیں چھوڑیں گے، اور اسرائیلی آبادکار مقبوضہ علاقوں کو فوری طور پر خالی کر دیں۔
