ٹرمپ انتظامیہ کا اسرائیل کی ایران کیخلاف جنگ میں مدد سے انکار
اسرائیل کی جانب سے ایران کے خلاف ممکنہ جنگ میں امریکہ کی حمایت کی درخواست پر ٹرمپ انتظامیہ نے فی الحال کوئی مثبت ردعمل ظاہر نہیں کیا ہے۔
امریکی میڈیا رپورٹس کے مطابق، دو اسرائیلی حکام نے انکشاف کیا ہے کہ اسرائیل نے امریکہ سے مطالبہ کیا کہ وہ ایران کے جوہری پروگرام کے خاتمے اور جنگی کارروائی میں اسرائیل کا ساتھ دے، تاہم ٹرمپ انتظامیہ اس معاملے میں اب تک محتاط رویہ اختیار کیے ہوئے ہے۔
ایک اسرائیلی عہدیدار کے مطابق، صدر ڈونلڈ ٹرمپ نے اسرائیلی وزیراعظم کے ساتھ گفتگو کے دوران عندیہ دیا کہ اگر ضرورت پڑی تو امریکہ ایران کے خلاف کارروائی میں شامل ہو سکتا ہے۔ تاہم وائٹ ہاؤس کے ایک اعلیٰ اہلکار نے اس دعوے کی تردید کی ہے۔
دوسری جانب، ایک امریکی اہلکار نے اس بات کی تصدیق کی ہے کہ اسرائیل نے باضابطہ طور پر امریکہ سے جنگ میں شمولیت کی اپیل کی ہے، لیکن موجودہ امریکی حکومت فی الحال اس مطالبے پر غور کرنے سے گریزاں ہے۔
یہ پیش رفت ایسے وقت میں سامنے آئی ہے جب مشرق وسطیٰ میں ایران اور اسرائیل کے درمیان کشیدگی میں غیرمعمولی اضافہ دیکھنے میں آ رہا ہے اور عالمی سطح پر اس صورتحال پر گہری نظر رکھی جا رہی ہے۔
