ایئر انڈیا طیارہ حادثہ: پاکستانی سیاسی و سماجی شخصیات کا اظہارِ افسوس
احمد آباد (مانیٹرنگ ڈیسک) — بھارت کی ریاست گجرات میں احمد آباد ایئرپورٹ کے قریب ایئر انڈیا کا مسافر طیارہ ایک ڈاکٹرز ہاسٹل کی عمارت سے ٹکرا کر تباہ ہو گیا۔ طیارے میں سوار 240 افراد میں سے متعدد کے جاں بحق ہونے کی اطلاعات ہیں۔ اس افسوسناک واقعے پر پاکستان کی سیاسی، سماجی اور صحافتی شخصیات نے گہرے رنج و غم کا اظہار کیا ہے۔
وزیر دفاع خواجہ آصف نے حادثے پر افسوس کا اظہار کرتے ہوئے کہا:”احمد آباد طیارہ حادثے کی خبر سن کر دل دکھا۔ ہماری دعائیں اور ہمدردیاں متاثرین اور ان کے اہلِ خانہ کے ساتھ ہیں۔
سابق وزیراعظم میاں نواز شریف نے کہا:”یہ المیہ کسی ایک ملک کا نہیں، بلکہ انسانیت کا سانحہ ہے۔ ہم متاثرہ خاندانوں سے دلی تعزیت کرتے ہیں۔
پیپلز پارٹی کے چیئرمین بلاول بھٹو زرداری نے اپنے تعزیتی پیغام میں کہا:”یہ حادثہ دل دہلا دینے والا ہے۔ میں بھارت کے عوام سے دلی ہمدردی اور تعزیت کا اظہار کرتا ہوں۔
رکن قومی اسمبلی آصفہ بھٹو زرداری نے سوشل میڈیا پلیٹ فارم ‘ایکس’ پر لکھا:”طیارہ حادثے کی المناک خبر نے دل کو گہرے صدمے سے دوچار کیا۔ دعائیں اور ہمدردیاں متاثرہ خاندانوں کے ساتھ ہیں۔”
فنکار و سماجی کارکن فخر عالم نے لکھا:”احمد آباد حادثے کی خبر سن کر شدید دکھ ہوا۔ جاں بحق افراد کے اہل خانہ کے ساتھ تعزیت اور دعاگو ہوں۔”
معروف صحافی حامد میر نے اس سانحے کو پورے خطے کے لیے ایک المیہ قرار دیا:”ہوائی سفر دن بہ دن غیر محفوظ ہوتا جا رہا ہے۔ میری دعائیں حادثے کے تمام متاثرین کے ساتھ ہیں۔”
پاکستانی رہنماؤں اور شخصیات کے ان بیانات سے یہ واضح ہوتا ہے کہ انسانی سانحات کی تکلیف سرحدوں سے ماورا ہوتی ہے، اور دکھ کی اس گھڑی میں پاکستانی عوام بھی بھارت کے ساتھ ہمدردی رکھتے ہیں۔
