خضدار نال سٹی میں فائرنگ، امن فورس کے کئی اہلکار جاں بحق
بلوچستان کے ضلع خضدار کے علاقے نال سٹی میں آج صبح پیش آنے والے ایک مسلح حملے میں امن فورس کے متعدد اہلکار جاں بحق ہو گئے۔ واقعہ اس وقت پیش آیا جب فورس کے اہلکار معمول کے گشت پر تھے۔
عینی شاہدین کے مطابق حملہ آوروں نے اچانک فائرنگ کر کے اہلکاروں کو نشانہ بنایا اور ان سے اسلحہ و دیگر سامان لے کر فرار ہو گئے۔ واقعے کے بعد علاقے میں شدید خوف و ہراس پھیل گیا ہے، جبکہ سیکیورٹی فورسز نے جائے وقوعہ کو گھیرے میں لے کر تفتیش شروع کر دی ہے۔
تاحال کسی گروپ نے حملے کی ذمہ داری قبول نہیں کی۔ حکام کا کہنا ہے کہ واقعے کی مکمل تحقیقات کی جا رہی ہیں۔
ذرائع کے مطابق، حملے کا نشانہ بننے والی امن فورس کی قیادت نیشنل پارٹی کے رہنما اسلم بزنجو کے بیٹے شمیر بزنجو کر رہے تھے، جن پر مختلف حلقوں کی جانب سے انسانی حقوق کی مبینہ خلاف ورزیوں کے الزامات بھی سامنے آتے رہے ہیں۔
سیکیورٹی ادارے واقعے کے محرکات اور حملہ آوروں کی شناخت کے لیے مختلف پہلوؤں سے تفتیش کر رہے ہیں۔
