پاکستانی کوہ پیما سرباز علی نے نئی تاریخ رقم کردی
پاکستانی کوہ پیما سرباز علی نے کوہ پیمائی کی دنیا میں ایک نیا سنگ میل عبور کرتے ہوئے دنیا کی تمام 8 ہزار میٹر سے بلند 14 چوٹیاں بغیر مصنوعی آکسیجن کے سر کرلیں۔ وہ یہ کارنامہ انجام دینے والے پاکستان کے پہلے کوہ پیما بن گئے ہیں۔
سرباز علی نے یہ تاریخی کارنامہ آج 8,586 میٹر بلند کینچن جونگا سر کرکے مکمل کیا۔ اس سے قبل وہ گزشتہ ماہ اناپورنا کو بھی بغیر آکسیجن کے سر کر چکے تھے۔
یاد رہے کہ سرباز علی پہلے ہی 14 میں سے 12 بلند ترین چوٹیاں سر کر چکے تھے، تاہم ابتدائی سفر کے دوران اناپورنا اور کینچن جونگا پر انہوں نے آکسیجن کا استعمال کیا تھا۔ تاریخی ریکارڈ کے لیے انہیں یہ دونوں چوٹیاں دوبارہ اور بغیر آکسیجن کے سر کرنا تھیں۔
اب وہ ان تمام 8 ہزار میٹر سے بلند چوٹیاں بغیر کسی اضافی آکسیجن کے سر کرنے والے دنیا کے چند منتخب کوہ پیماؤں میں شامل ہو چکے ہیں، اور پاکستان کے لیے ایک قابلِ فخر نام بن چکے ہیں۔
