رافیل گرا، بھارت ہارا، مغرب ہکا بکا ، پاکستانی مہارت نے سب کو چونکا دیا،جرمن میڈیا
برلن / واشنگٹن (ویب ڈیسک) جرمن اخبار اور امریکی دفاعی جریدے نے ایک تہلکہ خیز رپورٹ میں انکشاف کیا ہے کہ بھارت کا “آپریشن سندور”، جس میں فرانسیسی ساختہ رافیل لڑاکا طیارے استعمال کیے گئے، پاکستان اور چین کے فضائی دفاعی نظام کے سامنے بری طرح ناکام ہو گیا۔
رپورٹ کے مطابق چین کے J-10C طیاروں اور PL-15 ائیر ٹو ائیر میزائل سسٹم نے نہ صرف بھارتی رافیل کو مار گرایا بلکہ بھارتی فضائیہ کو شدید نقصان اور خفت کا سامنا کرنا پڑا۔ پاکستانی پائلٹس کی مہارت اور مؤثر حکمت عملی نے بھارتی حملہ پسپا کر دیا۔
جرمن اخبار نے لکھا:”رافیل کی تباہی یورپی دفاعی صنعت کے لیے ایک وارننگ ہے، اور بھارت کی تکنیکی برتری کا زعم بری طرح پاش پاش ہو گیا۔”
دوسری طرف امریکی جریدے “نیشنل انٹرسٹ” نے بھی خبردار کیا ہے کہ چین کا J-10C طیارہ عالمی منڈی میں امریکا کے F-16 کے لیے حقیقی چیلنج بنتا جا رہا ہے۔رپورٹ کے مطابق”اگر چینی کمپنیاں J-10 کی صلاحیتوں کو بروئے کار لا کر F-16 کی فروخت میں خلل ڈالنے میں کامیاب ہو جاتی ہیں تو یہ امریکی دفاعی معیشت کے لیے ایک کاری ضرب ہو گی۔”امریکی رپورٹ میں کہا گیا کہ پاکستان اور چین کے مشترکہ دفاعی سسٹمز اور جنگی حکمت عملی نے نہ صرف بھارت کی پیش قدمی کو روکا بلکہ مغرب کے لیے یہ اشارہ بھی چھوڑا کہ میدانِ جنگ میں صرف مہنگے ہتھیار نہیں، مؤثر استعمال اور اتحاد کامیابی کی کنجی ہیں۔
