بھارت کو جج، جیوری اور جلاد بننے کی اجازت نہیں دی جاسکتی، ترجمان پاک فوج
راولپنڈی: پاک فوج کے ترجمان لیفٹیننٹ جنرل احمد شریف چوہدری نے واضح کیا ہے کہ بھارت کو کسی صورت خودساختہ جج، جیوری اور سزا دینے والا بننے کی اجازت نہیں دی جائے گی۔
ترک میڈیا کو انٹرویو دیتے ہوئے ڈی جی آئی ایس پی آر نے کہا کہ بھارت لائن آف کنٹرول پر اشتعال انگیزی میں ملوث ہے اور جان بوجھ کر پاکستانی شہری آبادی کو نشانہ بنا رہا ہے۔ انہوں نے کہا کہ پاکستانی افواج صرف ان بھارتی پوسٹوں پر جوابی کارروائی کر رہی ہیں جہاں سے فائرنگ ہو رہی ہے۔
ڈی جی آئی ایس پی آر کا کہنا تھا کہ پاکستان نے نہ کوئی ڈرون حملہ کیا اور نہ ہی راکٹ یا فضائی کارروائی، بلکہ صرف چھوٹے ہتھیاروں سے دفاعی جواب دیا گیا۔ انہوں نے کہا کہ بھارت کی جانب سے پاکستان پر حملوں کا الزام جھوٹ اور فسانہ ہے، کیونکہ آج کے دور میں ہر حملے کا الیکٹرانک ثبوت ہوتا ہے، اور اگر پاکستان نے کوئی میزائل یا فضائی حملہ کیا ہوتا تو بھارت اس کا کوئی ثبوت پیش کرتا۔
ترجمان پاک فوج نے بھارتی پروپیگنڈے کو بے نقاب کرتے ہوئے سوال اٹھایا کہ اگر بھارت نے پاکستانی طیارے مار گرائے ہیں تو ان کا ملبہ کہاں ہے؟ اور اگر پائلٹ گرفتار کیے گئے ہیں تو وہ کہاں ہیں؟ انہوں نے کہا کہ بھارتی میڈیا فرضی کہانیاں گھڑ رہا ہے اور بین الاقوامی میڈیا کو بھی خاموش کر دیا گیا ہے، لیکن جب پاکستان جواب دے گا تو دنیا خود سنے گی۔
لیفٹیننٹ جنرل احمد شریف چوہدری نے کہا کہ بھارت دہشتگردی کے واقعات کو سیاسی مقاصد کے لیے استعمال کر رہا ہے۔ پاکستان نے پہلگام واقعے کی غیر جانبدار اور شفاف تحقیقات کی پیشکش کی تھی جسے بھارت نے مسترد کر دیا۔ انہوں نے مزید انکشاف کیا کہ بھارت نے پاکستان میں مختلف مقامات پر عبادت گاہوں کو نشانہ بنایا اور عورتوں، بچوں و بزرگوں کو بھی نہیں بخشا، مگر آج تک کوئی ثبوت پیش نہیں کر سکا۔
ترجمان کا کہنا تھا کہ پاکستان بھارتی الزامات کو مکمل طور پر مسترد کرتا ہے اور واضح کرتا ہے کہ بھارت کو خطے کا جلاد بننے کا کوئی اختیار نہیں۔
