وزیراعظم کا میانمار کے سفارتخانے کا دورہ
وزیراعظم محمد شہباز شریف کی میانمار میں حالیہ تباہ کن زلزلے کے نتیجے میں قیمتی جان و مال کے نقصان پر اظہار ہمدردی و یکجہتی کے لیے میانمار سفارت خانے آمد
وزیراعظم پاکستان محمد شہباز شریف نے میانمار میں حالیہ تباہ کن زلزلے کے نتیجے میں قیمتی جان و مال کے نقصان پر اظہار ہمدردی و یکجہتی کے لیے میانمار کے سفارت خانے کا دورہ کیا۔ وزیراعظم نے میانمار کے سفیر ونا ہان (Wunna Han) سے ملاقات کی اور میانمار میں حالیہ زلزلے میں قیمتی جانوں کے ضیاع پر گہرے دکھ اور افسوس کا اظہار کیا۔
وزیراعظم نے کہا کہ “ہم میانمار میں حالیہ زلزلے کے نتیجے میں زخمی ہونے والے افراد کی جلد صحتیابی اور متاثرہ خاندانوں کی بحالی کے لیے دعا گو ہیں۔” انہوں نے مزید کہا کہ حکومت پاکستان نے خیموں، ادویات اور دیگر امدادی سامان پر مشتمل 35 ٹن کی ایک کھیپ خصوصی پرواز کے ذریعے میانمار روانہ کر دی ہے، اور ضرورت کے مطابق مزید امداد بھی بھجوائی جا رہی ہے۔
وزیراعظم نے کہا کہ “پاکستان میانمار کے لیے اس مشکل کی گھڑی میں ہر ممکن مدد کے لیے تیار ہے۔”
میانمار کے سفیر ونا ہان نے وزیراعظم کی جانب سے سفارت خانے آمد اور حکومت پاکستان کے بھرپور تعاون پر شکریہ ادا کیا۔ انہوں نے کہا کہ “پاکستان اور میانمار دوست ممالک ہیں، اور اس مشکل گھڑی میں پاکستان کے تعاون پر میانمار کی قوم آپ کی مشکور ہے۔”
اس ملاقات میں وفاقی وزیر اطلاعات و نشریات عطا اللہ تارڑ اور معاون خصوصی طارق فاطمی بھی شریک تھے۔
