پاکستان 27 رمضان کو بنا، کیا یہ محض اتفاق تھا؟ نیشنل یوتھ کنونشن میں تاریخی انکشاف
اسلام آباد (نمائندہ خصوصی) وزارت اطلاعات و نشریات کے زیر اہتمام نیشنل یوتھ/علماء کنونشن “رب ذوالجلال کا احسان – پاکستان” 28 مارچ 2025ء کو جناح کنونشن سینٹر، اسلام آباد میں منعقد ہوگا۔ یہ تقریب جمعتہ الوداع اور رمضان المبارک کی 27 ویں شب (شب قدر) کی مناسبت سے منعقد کی جا رہی ہے، جس میں ملک بھر سے مختلف مکاتب فکر کے افراد، علماء اور نوجوان شرکت کریں گے۔وزیراعظم پاکستان محمد شہباز شریف تقریب کے مہمان خصوصی ہوں گے اور نوجوانوں سے خطاب کریں گے۔ اپنے خطاب میں وہ پاکستان کے قیام کے بنیادی نظریے، اس کے جغرافیائی، دفاعی اور معاشی اہمیت پر روشنی ڈالیں گے۔ وزیراعظم اس موقع پر اس حقیقت کو اجاگر کریں گے کہ پاکستان 27 رمضان المبارک (شب قدر) کو ایک اسلامی نظریاتی ریاست کے طور پر معرض وجود میں آیا، جس کی بنیاد “پاکستان کا مطلب کیا؟ لا الہ الا اللہ” کے اصول پر رکھی گئی۔
یہ کنونشن ملک کے نوجوانوں کو قومی ترقی میں مؤثر کردار ادا کرنے کے لیے حوصلہ افزائی کرے گا۔ وزیراعظم حکومت کی جانب سے نوجوانوں کے لیے اصلاحاتی اقدامات، تعلیمی، روزگار، ڈیجیٹل معیشت اور کاروباری مواقع کے مختلف منصوبوں پر روشنی ڈالیں گے۔پاکستان دنیا کی واحد اسلامی جوہری طاقت ہونے کے ناطے عالمی سطح پر منفرد مقام رکھتا ہے۔ اس کے ساتھ ساتھ، پاکستان کی مسلح افواج نہ صرف اسلامی دنیا کی مضبوط ترین عسکری قوت ہیں بلکہ پیشہ ورانہ مہارت کے لحاظ سے بھی دنیا کی بہترین افواج میں شمار ہوتی ہیں۔تقریب میں ماہرین پاکستان کے جغرافیائی محل وقوع اور اس کی جنوبی ایشیا میں کلیدی پوزیشن پر بھی روشنی ڈالیں گے، جو اسے مستقبل کے عالمی معاشی اور جیو پولیٹیکل منظر نامے میں ایک اہم کردار ادا کرنے کا موقع فراہم کرتی ہے۔یہ کنونشن نوجوانوں کو جدید دنیا کے تقاضوں سے ہم آہنگ کرنے اور ملک کی ترقی میں عملی طور پر حصہ لینے کے لیے ایک نئے ولولے کے ساتھ آگے بڑھنے کا عزم فراہم کرے گا۔
