پولیس کی تنخواہوں میں تاریخی اضافہ! بڑا اعلان کر دیا گیا
پشاور: وزیراعلیٰ خیبرپختونخوا علی امین گنڈاپور کی زیر صدارت اعلیٰ سطحی اجلاس منعقد ہوا، جس میں پولیس سے متعلق اہم فیصلے کیے گئے۔ اجلاس میں چیف سیکرٹری، انسپکٹر جنرل پولیس، ایڈیشنل چیف سیکرٹری داخلہ، محکمہ خزانہ اور پولیس کے اعلیٰ حکام نے شرکت کی۔
وزیراعلیٰ نے خیبرپختونخوا پولیس کی ضروریات کو پورا کرنے کے لیے 5.5 ارب روپے کے پیکج کی منظوری دے دی، جس میں سے 3 ارب روپے پولیس گاڑیوں کی بلٹ پروفنگ اور جدید آلات کی خریداری کے لیے مختص کیے گئے۔
اجلاس میں فیصلہ کیا گیا کہ ہر ضلع میں جدید اسلحہ سے لیس اسپیشل ویپن اینڈ ٹیکنیک ٹیمیں تشکیل دی جائیں گی، جبکہ پولیس تھانوں اور چیک پوسٹوں کو مزید محفوظ بنانے کے لیے 1.3 ارب روپے فراہم کرنے کا اعلان کیا گیا۔
اس کے علاوہ، سالانہ ترقیاتی پروگرام کے تحت پولیس تھانوں اور چیک پوسٹوں کی تعمیر کے باقی منصوبوں کے لیے 500 ملین روپے جاری کیے گئے۔ وزیراعلیٰ نے پولیس کے لیے جدید ساز و سامان کی فراہمی کا بھی اعلان کرتے ہوئے 720 ملین روپے نائٹ ویژن گوگلز، سنائپرز اور دیگر آلات کے لیے مختص کیے۔
اجلاس میں خیبرپختونخوا پولیس افسران کی تنخواہیں بلوچستان پولیس کے برابر، جبکہ پولیس اہلکاروں کی تنخواہیں پنجاب پولیس کے مساوی کرنے کا اصولی فیصلہ کیا گیا۔
بریفنگ کے دوران بتایا گیا کہ بلوچستان میں پولیس افسران کی تنخواہیں دیگر صوبوں سے زیادہ ہیں، جبکہ پنجاب میں پولیس اہلکاروں کو سب سے زیادہ تنخواہیں دی جاتی ہیں۔ اس فیصلے سے خیبرپختونخوا پولیس کے مراعات میں واضح بہتری آئے گی۔
