عوام کیلئے خوشخبری! فی یونٹ بجلی 8 روپے سستی
وزیر اعظم شہباز شریف 23 مارچ کو عوام کے لیے بڑی خوشخبری سنانے والے ہیں! عالمی مالیاتی فنڈ (IMF) کی منظوری کے بعد حکومت نے بجلی کے نرخوں میں 8 روپے فی یونٹ تک کمی کا اعلان کرنے کا فیصلہ کر لیا ہے، جو یکم اپریل 2025 سے نافذ ہوگی۔ عوام کو اس کمی کے اثرات مئی کے بجلی بلوں میں واضح طور پر نظر آئیں گے۔
میڈیا رپورٹس کے مطابق، 4.73 روپے فی یونٹ مستقل ایڈجسٹمنٹ کے طور پر کم کیے جائیں گے۔ اس میں حکومت کی جانب سے 6 آزاد بجلی پیدا کرنے والے منصوبے (IPPs) منسوخ کرنے، 16 آئی پی پیز کے معاہدے ‘ٹیک اینڈ پے’ ماڈل میں تبدیل کرنے، بیگاس پاور پلانٹس کو روپے میں منتقل کرنے اور سرکاری بجلی گھروں (GPPs) کے ریٹرن آن ایکویٹی (RoE) کو 13 فیصد پر مقرر کرنے جیسے بڑے فیصلے شامل ہیں۔
حکومت نے بجلی کی قیمتوں پر پٹرولیم مصنوعات کے اثرات کو بھی مدنظر رکھا ہے، جس کے نتیجے میں 1.30 روپے فی یونٹ کی کمی صرف ایک ماہ کے لیے دی جائے گی۔ تاہم، اگر عالمی سطح پر تیل کی قیمتیں مزید کم ہوئیں تو یہ ریلیف 250 ارب روپے تک پہنچ سکتا ہے۔ مزید 2 روپے فی یونٹ کی اضافی کمی کے لیے بھی مختلف آپشنز پر غور کیا جا رہا ہے، جسے 23 مارچ کے اعلان سے قبل حتمی شکل دی جائے گی۔
ایک اور بڑی خبر یہ ہے کہ جولائی 2025 سے بجلی کے بلوں میں 35 روپے کی پی ٹی وی فیس ختم کر دی جائے گی! حکومت نے فیصلہ کیا ہے کہ مالی سال 2026 کے بجٹ میں پی ٹی وی کے لیے الگ فنڈز مختص کیے جائیں گے تاکہ عوام کو مزید ریلیف فراہم کیا جا سکے۔
یہ اقدامات بجلی کے بڑھتے نرخوں سے پریشان عوام کے لیے بڑی راحت ثابت ہوں گے، اور حکومت کا ہدف 8 میں سے 6 روپے کی کمی کو مستقل طور پر لاگو کرنا ہے تاکہ بجلی کی قیمتوں میں طویل مدتی استحکام ممکن بنایا جا سکے۔
