بلوچستان کے طلبہ کیلئے بڑی خوشخبری! مزید ترقیاتی منصوبے تیار
اسلام آباد: سنٹرل ڈویلپمنٹ ورکنگ پارٹی کے اجلاس میں وفاقی وزیر برائے منصوبہ بندی، ترقی و اصلاحات احسن اقبال نے کہا کہ مسلم لیگ ن کی حکومت نے بلوچستان کے نوجوانوں کو اعلیٰ تعلیم کی سہولیات فراہم کرنے کے لئے ماضی میں متعدد اہم تعلیمی منصوبے شروع کیے ہیں۔ ضرورت اس امر کی ہے کہ بلوچستان کے عوام کو ان منصوبوں سے مکمل آگاہی فراہم کی جائے تاکہ بلوچستان میں دہشت گردی کرنے والے گروہوں کی سازشوں کو ناکام بنایا جا سکے۔
وفاقی وزیر نے مزید کہا کہ 2013 سے 2018 کے دوران، مسلم لیگ ن حکومت نے بلوچستان کے طلبہ کے لیے ملک کی بہترین یونیورسٹیوں میں 5,000 اسکالرشپس فراہم کیے، جبکہ پی ڈی ایم حکومت کے دوران مزید 5,000 اسکالرشپس فیز ٹو میں دیے گئے۔ انہوں نے چیئرمین ہائر ایجوکیشن کمیشن (HEC) کو ہدایت دی کہ بلوچستان کے نوجوانوں کو تعلیم اور ترقی کے مواقع فراہم کرنے کے لیے فوری طور پر ایک جامع اور مؤثر حکمتِ عملی مرتب کی جائے، تاکہ وہ ایک مضبوط اور مستحکم پاکستان کا حصہ بن سکیں۔
احسن اقبال نے مزید زور دیا کہ نوجوانوں کو مثبت نصابی اور غیر نصابی سرگرمیوں میں شامل کیا جائے اور ان کے لیے اعلیٰ تعلیمی مواقع فراہم کیے جائیں۔ اس سلسلے میں، انہوں نے جامعات کے وائس چانسلرز کو ہدایت دی کہ وہ علاقائی بنیادوں پر یونیورسٹیوں میں گروہ بندی کے خاتمے کے لیے ہاسٹلوں میں طلبہ کو مختلف علاقوں کیساتھ رہائش دیں تاکہ ان میں یکجہتی پیدا ہو ۔
انہوں نے اس عزم کا اعادہ کیا کہ حکومت نوجوانوں کی بہتری اور ان کے روشن مستقبل کے لیے ہر وقت کوشاں ہے اور انہیں تعلیمی و ترقیاتی منصوبوں کے ذریعے قومی دھارے میں شامل کرنے کے لیے ہر ممکن اقدامات کیے جائیں گے۔
