پشین کے ہسپتال میں دھماکا، کئی افراد زخمی
بلوچستان کے ضلع پشین میں ایک اسپتال کے اندر دھماکا ہوا ہے جس کے نتیجے میں کئی افراد کے زخمی ہونے کی اطلاعات ہیں۔نجی نیوز کے نمائندے مصطفیٰ خان ترین کے مطابق یہ دھماکا پشین بائی پاس کے قریب واقع ہسپتال میں ہوا ہے۔ اس دھماکے کے نتیجے میں عمارت کو شدید نقصان پہنچا ہے جبکہ کئی افراد زخمی ہوگئے ہیں۔
دھماکے کی اطلاع ملتے ہی پولیس سمیت دیگر سکیورٹی ادارے جائے وقوعہ پر پہنچ گئے اور ہسپتال کو گھیرے میں لے کر شواہد اکٹھا کرنا شروع کر دئیے ہیں۔ریسکیو ٹیموں نے بھی جائے وقوعہ پر پہنچ کر امدادی سرگرمیاں شروع کر دی ہیں۔ ابتدائی اطلاعات کے مطابق دھماکے میں سات افراد زخمی ہوئے ہیں، جن میں سے دو کی حالت تشویش ناک بتائی جا رہی ہے۔ابتدائی تحقیقات میں ہسپتال میں دھماکے کی وجہ عمارت میں موجود گیس سلنڈر کی لیکیج بتائی جا رہی ہے۔
