بلوچستان میں رات کا سفر جان لیوا، قومی شاہراہوں پر پابندی عائد
پاکستان کے صوبہ بلوچستان میں حالات تاحال گھمبیرہیں، آئی ایس پی آر نے دعویٰ کیا ہے کہ ضلع قلات میں سکیورٹی فورسز کی کارروائی میں 6 دہشتگرد ہلاک ہوگئے۔پاک فوج کے شعبہ تعلقات عامہ کے مطابق قلات میں سکیورٹی فورسز نے دہشتگردوں کی موجودگی کی خفیہ اطلاعات پر کارروائی کی۔ سکیورٹی فورسز کے آپریشن میں 6 دہشتگرد مارے گئے۔
دوسری جانب صدر مملکت آصف علی زرداری نے قلات میں 6 دہشتگرد جہنم واصل کرنے پر سکیورٹی فورسز کو خراج تحسین پیش کیا۔ صدر مملکت نے قلات میں کامیاب کارروائی پر سکیورٹی فورسز کی بہادری کو سراہتے ہوئے کہا کہ دہشتگردوں کے مکمل خاتمے تک سکیورٹی فورسز کی کارروائیاں جاری رہیں گی اور دہشتگردوں کے خاتمے، ملکی دفاع کیلئے ہمارا عزم غیر متزلزل رہے گا۔دریں اثنا بلوچستان انتظامیہ نے متعدد اضلاع میں قومی شاہراہوں پر رات میں سفر سے روک دیا گیا۔
بلوچستان کے مختلف اضلاع میں رات کے وقت قومی شاہراہوں پر سفر پر پابندی عائد کر دی گئی۔ کچھی، موسیٰ خیل، ژوب، گوادر اور نوشکی کے ڈپٹی کمشنرز نے نوٹیفکیشن جاری کر دیا، جس کے مطابق شام 6 بجے سے صبح 6 بجے تک سفر ممنوع ہوگا۔ اس پابندی کا اطلاق سبی شاہراہ، ژوب-ڈی آئی خان شاہراہ، کوسٹل ہائی وے، کوئٹہ-تفتان اور لورالائی-ڈیرہ غازی خان شاہراہ پر بھی ہوگا۔ بلوچستان میں پبلک ٹرانسپورٹ پر حملوں کے حالیہ واقعات، خصوصاً گوادر میں 6 مسافروں کے قتل کے بعد یہ فیصلہ کیا گیا ہے۔
