وفاقی وزیر اطلاعات عطا اللہ تارڑ نے کہا ہے کہ پوری امتِ مسلمہ کا اس بات پر اجماع ہے کہ ریاستِ پاکستان کے خلاف کوئی جہاد نہیں ہو سکتا، جبکہ پکڑے گئے یا مارے گئے دہشت گردوں کا اسلام سے دور دور تک کوئی تعلق نہیں۔
قومی پیغامِ امن کمیٹی کانفرنس سے خطاب کرتے ہوئے وزیر اطلاعات نے بتایا کہ قومی پیغامِ امن کمیٹی کا باقاعدہ سیکریٹریٹ قائم کر دیا گیا ہے۔ انہوں نے کہا کہ ملک میں امن کے قیام کے لیے علمائے کرام کا کردار انتہائی اہم ہے، کیونکہ دہشت گردوں کا نہ کوئی مذہب ہے اور نہ کوئی وطن۔
عطا اللہ تارڑ نے کہا کہ پیغامِ امن کمیٹی اس نظریے کو فروغ دے گی کہ دہشت گردی کا اسلام سے کوئی تعلق نہیں۔ انہوں نے واضح کیا کہ اسلام امن، برداشت اور رواداری کا مذہب ہے اور اس پیغام کو گھر گھر پہنچایا جائے گا۔
وزیر اطلاعات کا کہنا تھا کہ علماء کرام نے ہر دور میں ملک و قوم کی خدمت کی ہے، اور قومی پیغامِ امن کمیٹی کو مکمل اختیارات حاصل ہیں تاکہ امن کے پیغام کو مؤثر انداز میں عام کیا جا سکے۔ انہوں نے بتایا کہ پشاور کے دورے کے دوران تمام مکاتبِ فکر کے علماء سے مشاورت کی جائے گی۔
انہوں نے مزید کہا کہ فتنہ الہندوستان اور فتنہ الخوارج کو بیرونی فنڈنگ حاصل ہے اور یہ عناصر مسلسل بے نقاب ہو رہے ہیں۔ دہشت گرد معصوم شہریوں کو نشانہ بنا رہے ہیں، تاہم حکومت کا عزم ہے کہ دہشت گردی کا مکمل خاتمہ کیا جائے گا اور امن کے پیغام کو ہر سطح پر عام کیا جائے گا۔
