ٹانک اور لکی مروت میں پولیس کے قافلے پر حملوں کے نتیجے میں ایک بکتر بند گاڑی (APC) دھماکے میں تباہ ہو گئی، جس کے باعث ایس ایچ او سمیت 6 پولیس اہلکار شہید اور 3 زخمی ہو گئے۔
پہلا حملہ ٹانک کے علاقے گومل میں پیش آیا، جہاں دھماکہ کوٹ ولی سے تقریباً 25 کلومیٹر دور ہوا۔ پولیس کے مطابق اس حملے میں بکتر بند گاڑی مکمل طور پر تباہ ہو گئی۔ شہید ہونے والوں میں ایس ایچ او اسحاق احمد خان، اے ایس آئی شیر اسلم خان، ڈرائیور عبدالمجید، ارشد علی، حضرت علی اور احسان اللہ شامل ہیں۔ ریسکیو 1122 کی ٹیمیں جائے وقوع پر پہنچ گئیں اور لاشوں و زخمیوں کو ہسپتال منتقل کیا گیا۔
دوسرا واقعہ لکی مروت میں تھانہ صدر کی حدود درہ تنگ کے ساتھ پیش آیا، جہاں آئی ای ڈی بم کا دھماکہ ہوا۔ اس میں ایس ایچ او رازق خان سمیت 3 پولیس اہلکار زخمی ہو گئے۔ دھماکا خیز مواد درہ تنگ پل کے ساتھ نصب تھا، جس سے ڈی پی او لکی مروت کے گزرنے کا بھی خطرہ تھا۔ یاد رہے کہ اسی مقام سے گزشتہ روز ایک وکیل کو مسلح افراد نے اغوا کیا تھا۔
گورنر خیبرپختونخوا فیصل کریم کنڈی نے ٹانک حملے پر اعلیٰ حکام سے فوری رپورٹ طلب کی اور شہدا کے اہل خانہ کے ساتھ دلی ہمدردی کا اظہار کیا۔ انہوں نے کہا کہ بہادر جوان عوام کی جان و مال کی حفاظت کے لیے اپنی جان کی قربانی دے رہے ہیں اور دشمن کی کارروائیاں ہمارے حوصلے پست نہیں کر سکتیں۔
