راولپنڈی سے ملتان جانے والی ایک مسافر بس تلہ گنگ کے علاقے ڈھوک پٹھان میں شدید دھند کے باعث 100 فٹ گہری کھائی میں جا گری، جس کے نتیجے میں 5 افراد موقع پر جاں بحق جبکہ 16 مسافر شدید زخمی ہو گئے۔
ریسکیو 1122 کے مطابق موٹر وے اور سی پیک دھند کے باعث بند ہونے کی وجہ سے بس جی ٹی روڈ کے راستے سفر کر رہی تھی۔ پہاڑی علاقہ ہونے اور حدِ نگاہ کم ہونے کے باعث بس ڈھوک پٹھان کے قریب بے قابو ہو کر گہری کھائی میں جا گری۔
حادثے کی اطلاع ملتے ہی ریسکیو 1122 اور ضلعی انتظامیہ نے فوری کارروائی کرتے ہوئے زخمیوں اور جاں بحق افراد کو گورنمنٹ سٹی اسپتال منتقل کیا، جہاں زخمیوں کو طبی امداد فراہم کی جا رہی ہے۔
ابتدائی اطلاعات کے مطابق حادثہ شدید دھند اور دشوار گزار پہاڑی راستے کے باعث پیش آیا۔
