اجلاس میں وزیرِ داخلہ نے ایف آئی اے کراچی زون اور ساؤتھ زون کی مجموعی کارکردگی کا تفصیلی جائزہ لیا اور منی لانڈرنگ میں ملوث مافیا کے خلاف بلا امتیاز اور بھرپور کریک ڈاؤن کی ہدایت جاری کی۔
محسن نقوی نے کہا کہ بڑے منی لانڈرز پر مضبوط ہاتھ ڈالا جائے، منی ٹریل کو مکمل طور پر بے نقاب کیا جائے اور حوالہ ہنڈی کے کاروبار کو کسی صورت برداشت نہیں کیا جائے گا۔ انہوں نے واضح کیا کہ کارروائیاں عملی طور پر نظر آنی چاہئیں۔
وزیرِ داخلہ نے انسانی اسمگلنگ میں ملوث ایجنٹس کے خلاف بھی مؤثر کارروائی کا حکم دیتے ہوئے کہا کہ معصوم افراد کو روزگار کا جھانسہ دے کر بیرونِ ملک بھجوانے والے عناصر کسی رعایت کے مستحق نہیں۔ بغیر کسی دباؤ کے ایجنٹس مافیا کے خلاف کارروائی کی جائے۔
انہوں نے جعلی ادویات کے کاروبار کو انسانی جانوں سے کھیلنے کے مترادف قرار دیتے ہوئے ہدایت کی کہ ایسے عناصر کو فوری طور پر قانون کے کٹہرے میں لایا جائے۔ ساتھ ہی ایف آئی اے کراچی زون میں انسانی وسائل کی کمی کو ترجیحی بنیادوں پر پورا کرنے کی یقین دہانی کرائی اور کہا کہ افسران کو تمام ضروری وسائل فراہم کیے جائیں گے، تاہم کارکردگی کے ذریعے ادارے کی نیک نامی میں اضافہ کرنا ہوگا۔
بریفنگ میں بتایا گیا کہ گزشتہ چار ماہ کے دوران انسانی اسمگلنگ میں ملوث 20 ایجنٹس کو گرفتار کیا گیا جبکہ 140 ملین روپے مالیت کی نان کسٹم مصنوعات اور منشیات ضبط کی گئیں۔ مسافروں کی سہولت کے لیے کراچی ایئرپورٹ پر سہولت سنٹر بھی قائم کر دیا گیا ہے۔
آخر میں وزیرِ داخلہ نے انچارج افسران سے اپنے متعلقہ سرکلز کی کارکردگی رپورٹس طلب کیں اور مزید محنت اور مؤثر اقدامات کی ہدایت کی۔ اجلاس میں ایف آئی اے کے اعلیٰ افسران اور تمام متعلقہ ڈپٹی ڈائریکٹرز نے شرکت کی۔
