پاک فضائیہ نے مقامی سطح پر تیار کردہ تیمور ویپن سسٹم کا کامیاب فلائٹ ٹیسٹ مکمل کر لیا ہے۔
آئی ایس پی آر کے مطابق تیمور ایک ائیر لانچڈ کروز میزائل ہے جو 600 کلومیٹر تک زمینی اور بحری اہداف کو مؤثر انداز میں نشانہ بنانے کی صلاحیت رکھتا ہے۔
آئی ایس پی آر کا کہنا ہے کہ کم بلندی پر پرواز کی صلاحیت تیمور میزائل کو دشمن کے ائیر اور میزائل ڈیفنس سسٹمز سے بچنے میں مدد دیتی ہے، جبکہ یہ جدید نیوی گیشن اور گائیڈنس سسٹمز سے لیس ہے۔
بیان میں کہا گیا ہے کہ تیمور ویپن سسٹم کی کامیابی سے پاک فضائیہ کی روایتی دفاعی صلاحیت میں نمایاں اضافہ ہوا ہے اور یہ علاقائی سکیورٹی ماحول میں پاکستان کے قابلِ اعتماد دفاع کو مزید مضبوط بناتا ہے۔ یہ کامیابی قومی سلامتی کے اہداف، عزم اور تکنیکی خود کفالت کی واضح عکاس ہے۔
فلائٹ ٹیسٹ کا مشاہدہ پاک افواج کے سینئر افسران اور سائنسدانوں نے کیا، جبکہ ائیر چیف مارشل ظہیر احمد بابر سدھو نے سائنسدانوں اور انجنیئرز کو مبارکباد دی۔
صدرِ مملکت نے بھی مقامی طور پر تیار کردہ تیمور ویپن سسٹم کے کامیاب تجربے پر پاک فضائیہ کو خراجِ تحسین پیش کرتے ہوئے کہا کہ جدید دفاعی ٹیکنالوجی کی مقامی تیاری قومی خود انحصاری اور سلامتی کے تحفظ کے عزم کی علامت ہے۔
