وزیراعظم شہباز شریف نے کہا ہے کہ پاکستان سے دہشت گردی کا مکمل خاتمہ ہی سانحہ آرمی پبلک اسکول پشاور کا حقیقی انصاف ہوگا۔
سانحہ اے پی ایس کی گیارہویں برسی کے موقع پر اپنے پیغام میں وزیراعظم نے کہا کہ پوری قوم آج ان معصوم بچوں، اساتذہ اور عملے کو خراجِ عقیدت پیش کر رہی ہے جنہوں نے وطن کے مستقبل کے لیے اپنی جانوں کا نذرانہ پیش کیا۔
انہوں نے کہا کہ سانحہ اے پی ایس ایک ایسا دلخراش واقعہ تھا جس نے پوری قوم کو غمزدہ کر دیا، مگر پاکستانی قوم کے حوصلے کو توڑ نہ سکا۔ اے پی ایس کے شہدا کی قربانیاں ہمیشہ قومی تاریخ میں یاد رکھی جائیں گی۔
وزیراعظم نے کہا کہ دہشت گردی کے خلاف جنگ ابھی ختم نہیں ہوئی، آج بھی ملک کے مختلف حصوں میں سیکیورٹی اہلکاروں اور معصوم شہریوں کو نشانہ بنایا جا رہا ہے، جو اس بات کی یاد دہانی ہے کہ ہمیں متحد ہو کر اس ناسور کا خاتمہ کرنا ہوگا۔
شہباز شریف نے کہا کہ حکومت دہشت گردی کے خلاف زیرو ٹالرنس پالیسی پر عمل پیرا ہے اور آخری دہشت گرد کے خاتمے تک بھرپور کارروائیاں جاری رہیں گی۔
انہوں نے دعا کی کہ اللہ تعالیٰ تمام شہدا کو جنت الفردوس میں اعلیٰ مقام عطا فرمائے اور ان کے لواحقین کو صبرِ جمیل دے۔
