پاک بحریہ نے شمالی بحیرہ عرب میں فضا تک مار کرنے والے میزائل کی کامیاب لائیو ویپن فائرنگ کر کے اپنی اعلیٰ آپریشنل تیاری اور جنگی صلاحیت کا عملی مظاہرہ کیا ہے۔
پاک بحریہ کے شعبہ تعلقات عامہ کے مطابق اس مشق کے دوران FM-90(N) ER سطح سے فضا تک مار کرنے والے میزائل کی کامیاب فائرنگ کی گئی، جس میں بحریہ کے جہاز نے انتہائی تیز اور مینوریبل فضائی اہداف کو کامیابی سے نشانہ بنایا۔
بیان میں کہا گیا ہے کہ اس فائر پاور کے مظاہرے سے پاک بحریہ کی جنگی تیاری، دفاعی مہارت اور پیشہ ورانہ صلاحیت ایک بار پھر اجاگر ہوئی ہے۔
اس موقع پر کمانڈر پاکستان فلیٹ ریئر ایڈمرل عبدالمنیب نے پاک بحریہ کے فلیٹ یونٹ کی لائیو فائرنگ کا مشاہدہ کیا اور مشق میں شریک افسران اور جوانوں کی پیشہ ورانہ مہارت، عزم اور اعلیٰ کارکردگی کو سراہا۔
کمانڈر پاکستان فلیٹ نے اس عزم کا اعادہ کیا کہ پاک بحریہ ہر قیمت پر پاکستان کے سمندری دفاع کو یقینی بنانے اور قومی بحری مفادات کے تحفظ کے لیے مکمل طور پر تیار ہے۔
