وزیراعظم محمد شہباز شریف نے کہا ہے کہ ان شاء اللہ وہ وقت دور نہیں جب پاکستان بیرونی قرضوں سے مکمل نجات حاصل کرکے معاشی طور پر خود کفیل ہو جائے گا۔ انہوں نے آئی ایم ایف کی جانب سے جاری پروگرام کے تحت مالی اجراء کو حکومتی معاشی اصلاحات اور ان کے شفاف نفاذ کا اعتراف قرار دیا۔
وزیراعظم نے حکومتی معاشی ٹیم کی کوششوں کو سراہتے ہوئے کہا کہ پاکستان کی معاشی بہتری اور اصلاحاتی ایجنڈے کے عملی نفاذ میں چیف آف آرمی اسٹاف و چیف آف ڈیفنس فورسز فیلڈ مارشل سید عاصم منیر کا کردار انتہائی اہم اور کلیدی ہے، جن کی معاونت نے معاشی استحکام کی راہ ہموار کی۔
انہوں نے کہا کہ آئی ایم ایف کا پاکستان کی اصلاحاتی کوششوں پر اطمینان وزیر خزانہ محمد اورنگزیب اور ان کی ٹیم کی دن رات محنت کا نتیجہ ہے۔ عالمی ادارے کی جانب سے مالی اجراء اس بات کا ثبوت ہے کہ پاکستان معاشی استحکام اور ترقی کے لیے ضروری اقدامات پر درست سمت میں گامزن ہے۔
وزیراعظم نے کہا کہ پاکستان کو ڈیفالٹ کے دہانے سے نکال کر معاشی استحکام کی راہ پر لانا ایک مشکل مرحلہ تھا، جس میں سیاسی جماعتوں نے سیاست قربان کی، جبکہ قوم نے معاشی مشکلات برداشت کر کے ناممکن کو ممکن بنایا۔
انہوں نے کہا کہ اللہ کے فضل و کرم سے پاکستان کی معاشی اصلاحات اور ڈیجیٹلائزیشن دنیا کے لیے ایک کامیاب کیس اسٹڈی بن چکی ہیں، اور بہت جلد پاکستان کی معاشی ترقی کا خواب حقیقت بنے گا۔
وزیراعظم شہباز شریف کا کہنا تھا کہ معاشی استحکام کے بعد اب ترقی کی جانب بڑھنے کے لیے مزید محنت کی ضرورت ہے، اور بطور خادم پاکستان وہ قوم کی خوشحالی اور بیرونی قرضوں سے مکمل نجات تک جدوجہد جاری رکھیں گے۔
