پشاور: ڈیرہ اسماعیل خان کے علاقے پنیالہ میں پولیس موبائل کو بم دھماکے کا نشانہ بنایا گیا، جس کے نتیجے میں تین پولیس اہلکار شہید ہو گئے۔ پولیس کے مطابق دھماکے میں اے ایس آئی گل عالم، کانسٹیبل رفیق اور ڈرائیور سخی جان جامِ شہادت نوش کر گئے، جبکہ کانسٹیبل آزاد شاہ محفوظ رہے۔
واقعے کی اطلاع ملتے ہی ریسکیو ٹیمیں اور پولیس کے اعلیٰ حکام جائے وقوعہ پر پہنچ گئے۔ شہدا کی میتوں کو اسپتال منتقل کیا گیا جبکہ شواہد اکٹھے کرنے کا عمل جاری ہے۔ دھماکے کے بعد ڈی ایس پی پنیالہ اور ایس ایچ او بھی موقع پر پہنچ گئے اور علاقے کی ناکا بندی کر دی گئی۔
وفاقی وزیر داخلہ کی مذمت
وفاقی وزیرِ داخلہ محسن نقوی نے حملے کی شدید مذمت کرتے ہوئے شہدا کو خراجِ عقیدت پیش کیا۔ انہوں نے اے ایس آئی گل عالم، کانسٹیبل رفیق اور سخی جان کے لواحقین سے دلی تعزیت کرتے ہوئے کہا کہ خیبرپختونخوا پولیس کے بہادر سپوتوں کی قربانیوں کو کبھی فراموش نہیں کیا جا سکتا۔
