مریخ، یعنی سرخ سیارہ، اب صرف فلکیاتی تحقیق کا حصہ نہیں بلکہ پاکستان کے شہروں اور علاقوں کے ناموں کی وجہ سے بھی منفرد پہچان رکھتا ہے۔ بین الاقوامی فلکیاتی ادارے انٹرنیشنل ایسٹرو نومیکل یونین (IAU) نے مریخ پر مختلف جغرافیائی خصوصیات کی شناخت کے لیے چھوٹے شہروں اور دیہاتوں کے نام منتخب کیے، جس کے نتیجے میں پاکستان کے 11 مقامات مریخی نقشے میں شامل کر دیے گئے ہیں۔
ان میں بلوچستان کے چمن، مستونگ، گوَش اور خوری، سندھ کے ہالا اور وادی سندھ، پنجاب کے جم پور، وادی راوی اور وادی جہلم، خیبرپختونخوا کا خان پور اور آزاد کشمیر کا شردہ شامل ہیں۔
یہ نام مریخ پر موجود گڑھوں، وادیوں اور دیگر ارضی خصوصیات کی شناخت کے لیے رکھے گئے ہیں، نہ کہ وہاں اصل میں انسان یا آبادیاں موجود ہیں۔ اس اقدام کا مقصد مریخی نقشہ بندی کو آسان بنانا اور تحقیقی مشنز میں رہنمائی فراہم کرنا ہے۔
یہ اقدام ایک فخر آمیز علامت بھی ہے کہ پاکستانی مقامات اب خلا میں بھی اپنی پہچان رکھتے ہیں اور بین الاقوامی فلکیاتی تحقیق میں شامل ہیں۔ سائنس دانوں کے مطابق، زمین اور مریخ کے درمیان یہ علامتی ربط تحقیق اور مطالعہ کے لیے ایک اہم ذریعہ ثابت ہوتا ہے۔
