اسلام آباد کے دورے پر آئے ہوئے مصری وزیرِ خارجہ بدر عبدالعاطی نے کہا ہے کہ غزہ کے لیے مجوزہ عالمی استحکام فورس (ISF) کا کردار صرف جنگ بندی کی نگرانی اور غزہ کی سرحدوں کی حفاظت تک محدود ہونا چاہیے۔ انہوں نے پاکستان پر زور دیا کہ وہ غزہ کی تعمیرِ نو، بحالی اور طبی معاونت میں زیادہ مؤثر اور نمایاں کردار ادا کرے۔
ایک نجی نیوز ویب سائٹ سے گفتگو میں انہوں نے واضح کیا کہ استحکام فورس کا مقصد امن مسلط کرنا نہیں بلکہ موجودہ جنگ بندی کو برقرار رکھنا ہے، جبکہ فورس کا مینڈیٹ، طریقۂ کار اور فوجی دستوں کی فراہمی کے معاملات امریکا سمیت عالمی شراکت داروں سے مشاورت کے عمل میں ہیں۔
بدر عبدالعاطی نے بتایا کہ مصر جلد غزہ کی تعمیرِ نو کے لیے ایک بین الاقوامی کانفرنس کی میزبانی کرنے والا ہے اور پاکستان سے مالی تعاون کے ساتھ ساتھ نجی شعبے، تکنیکی مہارت اور طبی خدمات کی فراہمی میں بھی بھرپور شرکت کی توقع رکھتا ہے۔ ان کے مطابق غزہ میں تقریباً پچاس ہزار زخمی اور مریض ایسے ہیں جنہیں فوری طبی امداد کی ضرورت ہے۔
انہوں نے کہا کہ پاکستان اور مصر خطے میں پائیدار امن کے لیے آزاد فلسطینی ریاست کے قیام کو واحد حل سمجھتے ہیں۔ علاقائی صورتحال پر بات کرتے ہوئے انہوں نے سوڈان، ایران اور دیگر تنازعات میں سیاسی حل، مکالمے اور کشیدگی میں کمی پر زور دیا۔
دو طرفہ تعلقات کے حوالے سے مصری وزیرِ خارجہ نے تجارت، سرمایہ کاری، دفاعی تعاون اور ٹیکنالوجی کی منتقلی بڑھانے کی ضرورت پر زور دیتے ہوئے کہا کہ دونوں ملکوں کے درمیان تجارتی حجم کو دوگنا کیا جانا چاہیے۔
