لندن ( ویب ڈیسک) پاکستان نے علمی میدان میں ایک نمایاں کامیابی حاصل کی، جب آکسفورڈ یونین کے تصدیق شدہ مباحثے میں بھارتی وفد نے مباحثے سے دستبرداری اختیار کر کے پاکستان کو بلا مقابلہ فتح دلائی۔
پاکستانی ہائی کمیشن کے مطابق جنرل (ر) زبیر محمود حیات، سابق وزیر خارجہ حنا ربانی کھر اور ڈاکٹر محمد فیصل مباحثے میں شریک ہوئے، تاہم بھارتی وفد نے شرکت کی ہمت نہیں دکھائی۔ مباحثے کا موضوع بھارت کی پاکستان پالیسی تھا، جس پر پاکستانی وفد نے دلیل اور منطقی مؤقف کے ساتھ تیاریاں کی ہوئی تھیں۔
بیان میں کہا گیا کہ بھارتی وفد نے ممکنہ سوالات اور منطقی چیلنجز سے بچنے کے لیے مباحثہ شروع ہونے سے قبل ہی سبوتاژ کر دیا۔ آکسفورڈ یونین جیسے غیرجانبدار فورم پر بھارتی غیرحاضری نے ان کے مؤقف کی کمزوری واضح کر دی۔
پاکستانی ہائی کمیشن نے مزید کہا کہ بھارت کے نام نہاد سیکورٹی اور خارجہ پالیسی کے مؤقف کو کھلی بحث میں جواب دینے کا موقع ملا، مگر بھارتی مقررین نے مباحثے میں حصہ لینے سے انکار کر دیا۔ طلبہ کی اکثریت بھارتی ہونے کے باوجود بھارتی وفد ووٹ اور منطقی چیلنجز کا سامنا کرنے سے گریزاں رہا۔
بیان میں زور دیا گیا کہ پاکستان نے دلیل، مکالمہ اور قانونی مؤقف کے ذریعے مباحثہ جیتنے کی مکمل تیاری کر رکھی تھی، جبکہ بھارتی وفد کی غیرحاضری ان کی پالیسی کی ناکامی اور عوام کے سامنے سوالیہ نشان بن گئی۔ پاکستانی ہائی کمیشن نے اس موقع پر کہا کہ پاکستان کا موقف واضح، مدلل اور پراعتماد تھا، اور بھارت نے پسپائی کو حکمت عملی بنا لیا۔
