پاکستان مخالف پروپیگنڈا اور جعلی انسانی حقوق کے دعویداروں کے اصل چہرے بے نقاب ہو گئے ہیں۔ سوشل میڈیا پلیٹ فارم “ایکس” کی نئی اپڈیٹ نے ان جعلی علمبرداروں کا پردہ چاک کر دیا ہے۔
سیکیورٹی ذرائع کے مطابق افغانستان، فتنہ الہندوستان اور پشتون تحفظ موومنٹ غیر ملکی ایجنڈے پر سرگرم ہیں اور پاکستان کے خلاف انتشار، نفرت اور تقسیم کو فروغ دینے والے بھارتی اکاؤنٹس بھی آشکار ہو گئے ہیں۔
مزید تحقیقات میں معلوم ہوا کہ دہشتگردانہ بیانیے کو فروغ دینے کے لیے بھارت سمیت دنیا کے کئی ممالک سے اکاؤنٹس چلائے جا رہے تھے، اور ان کی اصل لوکیشن چھپانے کے لیے VPN کا استعمال کیا جا رہا تھا۔
فتنہ الخوارج اور فتنہ الہندوستان کے دہشتگردوں کے اکاؤنٹس بھی بھارت اور دیگر ممالک سے آپریٹ ہو رہے ہیں۔ بلوچستان اور خیبرپختونخوا میں انسانی حقوق کے دعویدار بھی دراصل غیر ملکی اکاؤنٹس کے ذریعے سرگرم ہیں، جن کے تانے بانے بھارت سے ملتے ہیں۔
یہ انکشاف ظاہر کرتا ہے کہ پاکستان دشمن پروپیگنڈا اور جھوٹ کی فیکٹریاں بیرون ملک سے چلائی جا رہی ہیں اور سیاسی بیانیے بھی غیر ملکی نیٹ ورک سے ہموار کیے جا رہے ہیں۔
