ایف سی ہیڈکوارٹر حملہ: دہشت گردوں کی شناخت مکمل
ایف سی ہیڈکوارٹر پشاور پر حملہ کرنے والے دہشت گردوں کی شناخت کرلی گئی ہے۔
پیر کی صبح 8 بجے کے بعد ایف سی ہیڈکوارٹر کے مرکزی دروازے پر ایک خودکش بمبار نے خود کو دھماکے سے اُڑا لیا، جس کے فوراً بعد دو مزید دہشت گردوں نے اندر داخل ہونے کی کوشش کی، تاہم سیکیورٹی اہلکاروں نے بروقت کارروائی کرتے ہوئے دونوں کو ہلاک کردیا اور بڑے نقصان کو ٹال دیا۔
واقعے میں ایف سی کے 3 جوان شہید ہوئے جبکہ 11 افراد زخمی ہوئے، جن میں عام شہری بھی شامل ہیں۔
حملے کے بعد سیکیورٹی فورسز کی بھاری نفری موقع پر پہنچ گئی اور علاقے کا محاصرہ کرکے جامع سرچ آپریشن کیا گیا۔
ابتدائی تحقیقات بھی شروع کردی گئیں جبکہ جائے وقوعہ کی سی سی ٹی وی فوٹیج بھی سامنے آگئی ہے، جس میں دیکھا جاسکتا ہے کہ پہلا حملہ آور گیٹ کے باہر خود کو دھماکے سے اُڑاتا ہے۔
سیکیورٹی ذرائع کے مطابق ہلاک کیے گئے تینوں حملہ آوروں کی شناخت ہوگئی ہے۔ مزید تحقیقات سے پتا چلا ہے کہ تینوں دہشت گرد افغان باشندے تھے، جن کے قبضے سے ہتھیار اور گولہ بارود بھی برآمد ہوا ہے۔
