ڈیجیٹل پاکستان: تیسرا عالمی کیبل سسٹم فعال
اسلام آباد (ویب ڈیسک) پاکستان نے دنیا کے تیز ترین زیرِ سمندر کیبل سسٹمز میں شامل SEA–ME–WE 6 سے باضابطہ طور پر کنکشن حاصل کر لیا، جس سے ملکی انٹرنیٹ بینڈوڈتھ میں 40 فیصد اضافہ ہو جائے گا۔
وفاقی وزیر آئی ٹی شازا فاطمہ کے مطابق یہ ایک سال میں پاکستان کا تیسرا بین الاقوامی کیبل سسٹم ہے، جو افریقہ–1 اور 2افریقہ کے بعد فعال ہوا۔ لینڈنگ پارٹنر ٹرانس ورلڈ ایسوسی ایٹس (TWA) ابتدائی طور پر 4 ٹیرا بٹ فی سیکنڈ کی اضافی صلاحیت شامل کرے گا، جس سے موجودہ بینڈوڈتھ 13.2 ٹیرا بٹ سے بڑھ کر نمایاں حد تک بہتر ہو جائے گی۔
21 ہزار 700 کلومیٹر طویل SMW-6 پاکستان کو سنگاپور سے فرانس تک متعدد ممالک سے جوڑتا ہے۔ 132 ٹیرا بٹ فی سیکنڈ ڈیزائنڈ صلاحیت اور 10 فائبر پیئرز پر مشتمل یہ نظام جدید ترین عالمی نیٹ ورکس میں شمار ہوتا ہے۔
اس پیش رفت کے ساتھ TWA کراچی میں ٹئیر تھری سرٹیفائیڈ ڈیٹا سینٹر بھی قائم کر رہا ہے، جو SMW-6، SMW-5، TW1 اور 2Africa سمیت بڑے کیبل سسٹمز سے براہِ راست منسلک ہوگا۔ یہ پاکستان کا پہلا ڈیٹا سینٹر ہو گا جو AI ورک لوڈز کے لیے ہائی ڈینسٹی ریکس کو سپورٹ کرے گا۔
ڈیٹا سینٹر جنوری 2026 سے کام شروع کرے گا اور ملکی و بین الاقوامی کاروباری اداروں کو کلاؤڈ انفراسٹرکچر، انٹرپرائز نیٹ ورکنگ اور کنٹینٹ ڈلیوری سروسز میں مضبوط سہولت فراہم کرے گا۔
