فیصل آباد فیکٹری دھماکا، ہلاکتیں 19 تک پہنچ گئیں
فیصل آباد کے علاقے ملک پور میں کیمیکل فیکٹری کا بوائلر پھٹنے سے خوفناک دھماکا ہوا، جس کے نتیجے میں جاں بحق افراد کی تعداد بڑھ کر 19 ہوگئی جبکہ 7 افراد زخمی ہیں۔ ریسکیو حکام کے مطابق دھماکے کی شدت اتنی زیادہ تھی کہ فیکٹری کے اطراف میں متعدد گھروں کی چھتیں بھی منہدم ہوگئیں۔
فیکٹری سے ملحقہ ایک گھر کی چھت گرنے سے میاں بیوی اور ان کے دو بچے ملبے تلے دب کر جان کی بازی ہار گئے۔ مجموعی طور پر جاں بحق ہونے والوں میں چھ بچے، دو خواتین، دو بزرگ اور فیکٹری کا ایک ملازم شامل ہے۔ علاقہ مکینوں نے اپنی مدد آپ کے تحت ملبے سے لاشوں کو نکالا۔
ریسکیو ٹیمیں جائے حادثہ پر امدادی سرگرمیوں میں مصروف ہیں جبکہ زخمیوں کو اسپتال منتقل کر دیا گیا ہے۔ حکام کا کہنا ہے کہ ابھی مزید افراد کے ملبے تلے دبے ہونے کا خدشہ موجود ہے، جس کے باعث سرچ آپریشن مزید تیز کر دیا گیا ہے۔
واقعے کی ابتدائی تحقیقاتی رپورٹ کے مطابق دھماکا ممکنہ طور پر گیس پائپ لائن پھٹنے کے باعث ہوا۔ کمشنر فیصل آباد راجا جہانگیر انور نے تصدیق کی کہ زیادہ جانی نقصان فیکٹری سے متصل گھروں میں رہائش پذیر افراد کا ہوا۔ انہوں نے مزید بتایا کہ ملک پور میں چار فیکٹریاں آپس میں جڑ کر کام کر رہی تھیں جبکہ وزیراعلیٰ پنجاب خود ریسکیو آپریشن کی نگرانی کر رہی ہیں۔
دھماکے کی آواز دور تک سنی گئی اور اس کی شدت سے فیکٹری کی عمارت مکمل طور پر زمین بوس ہوگئی جبکہ قریبی گھروں کی چھتیں بھی تباہ ہو گئیں۔
